Aizawlah SDG chungchang zirho a ni

Sorkar laipuia NITI Aayog leh Mizoram sorkara Planning & Programme Implementation department chuan nimin khan Assembly Annexe conference hall-ah 'Workshop on SDGs India Index 4.0 & Multidimensional Poverty Index' an buatsaih a, chief secretary Dr Renu Sharma-i'n a hmanpui.

Dr Renu Sharma chuan, SDG tihhlawhtlinna kawngah sorkarin hmalakna hrang hrang a kalpui mek tih sawiin, "SDG hmalakna leh hmachhawpte vila ûm zuitu tur committee péng hrang hrang din a ni a, Planning department-ah a khaikhawmtu tur SDGs Cell din a ni. District tinah DC kaihhruaina hnuaia committee din a ni bawk a, chak takin hmalak mek a ni," a ti.

Planning secretary Lalmalsawma Pachuau chuan, SDG tihhlawhtlinna kawnga Mizoram sorkar hmalakna leh hmachhawpte a tarlang a; NITI Aayog-in SDG tihhlawhtlinna kawnga state tinte dinhmun a tarlannaah Mizoramin nasa taka hma a sâwn thu a sawi.

SDG-a Mizoram dinhmun (NITI Aayog report)
 SDGs India Index.3.0 (2020-21)-ah Mizoram chu India ram pumah 12-na leh hmarchhakah pahnihna a ni.
 Mizoram chu 'hmasawn chak ber' leh 'state hmahruaitu' category-ah hlân kai a ni.
 Mizoramin a tih ṭhatna goal-te: SDG Goal 1 - no poverty, Goal 3 - good health & well-being, Goal 7 - affordable & clean energy, Goal 12 - sustainable consumption & production, Goal 16 - peace, justice & strong institutions.
 Mizoramin a tih chhiatna goal-te: SDG Goal 5 - gender equality, Goal 8 - decent work and economic growth, Goal 9 - industry, innovation & infrastructure, Goal 15 - life on land.
 Hmarchhak state district level ranking-ah Serchhip district chu pangana a ni a, Lawngtlai district chu 79-na a ni.