DC sawn chhuahna thupek sût phûtin Champhai khawpuiah dawr khâr a ni

Champhai DC Maria CT Zuali sawn chhuahna thupek sût tura sorkar kar nan Champhai District NGO Coordination Committee huaihawtin nimin khan Champhai khawpuiah dawrte khâr a ni. Hmalakna kal zelah January 24, Thawhṭanni-ah kawngzawh a ni dawn.

Champhai District NGO Coordination Committee-in ruahmanna a lo siam lâwk tawh angin, nimin khan zing kar aṭangin Champhai khawpuia dawr zawng zawng khâr a ni a; NGO-te'n dawr khâr vek tura ruahmanna an siam chu mipuiin an zawm ṭha hle tih Champhaia journalist-te chuan an sawi.

Champhaia journalist Lalnunsanga Fanai chuan, NGO Coordination Committee ruahmanna chu mipuiin an zawm ṭhat em avangin dawr khâr chu chhun dar 12-ah tihtawp a nih thu Vanglaini a hrilh.

NGO Coordination Committee hruaitute chu nizan khan an ṭhukhawm leh a, an hmalaknaa nimina dawr khâr chungchang an thlir lêt bakah, lungawi lohna an lantirna kal zel tura chêt dan turte an sawiho a ni.

Tarlan tawh angin, Champhai District NGO Coordination Committee hruaitute January 19, 2022-a ṭhukhawm chuan, Champhai DC Maria CT Zuali sawn chhuahna thupek, January 13, 2022-a tihchhuah sût tura an phûtna Mizoram sorkarin a tihhlawhtlin loh avangin lungawi lohna leh sorkar karna atan ruahmanna hrang hrang an siam a; DC transfer order copy an hâl nghal.

Champhai District Joint NGO-te ruahman angin, hmalakna hmasa atan nimin khan Champhaia dawrte khâr a ni a; January 24, Thawhṭanniah kawngzawh huaihawt a ni dawn. January 25, Thawhlehniah sorkar pisa zawng zawng khâr an tum a; January 26, Nilainiah total bandh huaihawt a, Republic Day boycott an tum bawk.

Champhai Joint NGO chuan thuchhuah an lo siam tawhah, an hmalakna chu DC transfer ngawr ngawr a ni lo tih tarlangin, "Dan loa thil titute leh dikna indona a nih avang leh, dik lo taka sumdawngtute kuta kan khawtlang, ram leh hnam tlu lut mek chhanchhuahna tur a nih avangin Champhai district mipui leh Mizo mipui zawng zawngte kan hmalakna min thláwp turin kan sáwm a ni," an ti.

NGO-te chuan, "Sorkar laka kan thil ngiatte Champhai district mipui tan a ni tih hriaa hma min lakpui turin Champhai district chhunga MLA-te kan phût a ni," an ti a; kawng hrang hranga sorkar an kar hnu pawha DC transfer order sût a la nih loh chuan na zawka hma an lâk zel tur thu an tarlang bawk.

Champhai NGO ruahmanna
21.1.2022: Champhai khawpuia dawr zawng zawng khâr
24.1.2022: Kawngzawh
25.1.2022: Sorkar pisa zawng zawng khâr
26.1.2022: Total bandh huaihawt leh Republic Day boycott