KHAWTHLIR

Bial Conference
Kristian Ṭhalai Pawl chuan Bial Conference an hmang ṭan. KṬP Bial Conference hi pastor bial eng emaw zatah chuan nizan khan ṭan a nih laiin, vawiina ṭan tur ṭhahnem tak an awm a, hripui lêng vanga hmang thei rih lo eng emaw zat an awm bawk. KṬP Bial Conference hi January thla Pathianni vawi linaah hman ṭhin a ni.

R-Day token gift
Republic Day 2022 pualin Lunglei district-a hmun 11 - District Jail, Bethel Centre, Salvation Army KK Home, TNT Kalvari Centre, MHIP Onyx Special School, WADA Centre, Chhanchhuaktu Ministry, Rescue Centre, BCO, BKHP Chhawmdawlna In leh Mercy Home-ahte token gift Rs 1,500 ṭheuh pek a ni a; pawisa sem chu a vaiin Rs 16,500 a ni.

Webinar buatsaih
Faith College, Aizawl chuan Mizoram University hnuaia semester thar bul ṭanna atan January 20, Ningani khan online kaltlangin 'Purposeful entrepreneurship- converting your passion into profession' thupui hmangin webinar an buatsaih. Resource person chu Global Women Leadership Award 2022 nominee Nidhi Banthia Mehta a ni a, MZU Incubation Cell-te pawh an tel. Faith College hi August 2019-a din a ni a; BBA, B.Com, BA (English, Mizo, Geography, Political Science leh Education) zir theihna a ni.

Minister-in hawng
Minister of state K Lalrinliana chuan nimin khan a bial chhung, Meidum khuaa MLA fund hmanga sak community hall leh khawtlangin an siam volleyball court a hawng. Minister hian Tlawng luiin lei a lâk avanga Bairabi hmun ṭhenkhata harsatna thlengte a enfiah nghal bawk.

Champhai MJA
MJA, Champhai District chuan nimin khan Champhai Press Club-ah Annual Conference vawi 34-na an hmang. Kum 2022-2024 chhunga hruaitu turte an thlang a, president-ah Lalhmingmawia Pachuau, vice president-ah Lalhlupuia leh treasurer-ah Lalhmingliana te an thlang.