Nghalimlui khaw nu thattua puh mi 3 man

January 6, 2022-a Sadin Mela (41), Nghalimlui, Lawngtlai district, a ram kalnaa thi a hmuh thattua puh mi pathum chu Vaseikai police-te'n January 20, Ningani khan an man a, Lawngtlai Police Station-ah an hruai nghal.

Thu dawn danin, Sadin Mela thattua puh mante chu Onil Kumar (23) s/o Puito Chondro, Drao Kumar (30) s/o Joy Moni leh Deba Kala (34) s/o Bido Muni, Nghalimlui khua vek an ni a; an lakah IPC Section 302 hmangin tualthah thubuai ziah luh a ni.

Lawngtlai police hotute sawi danin, Sadin Mela hi mi kut tuara thi nia rin a nih avangin police-te'n an chhui zui a, Sadin Mela thih nía nûla feh ve mi dangte'n mi pakhat an hmuh chu thu zawh fiah a ni a, a kawrah thisen ni àwm tak kai an hmuh chu Forensic endik tura thawn a nih hnuah, mihring thisen ngei a ni tih finfiah a ni. Chumi hnuah police hmaah a inpuang a, a thurualpui mi dang pahnih pawh man nghal an ni.

Sadin Mela hi January 6, 2022 zing khan an khua aṭanga km. 4 vela hláa an nûlah thing phur turin a kal a, a haw mai loh avangin ko turin a fanu a kal a, a fanu chuan a hmuh zawh loh avangin khawtlangin an zawng zui a, zan dar 7 velah an nùl bula Nal lui kamah thia hmuh a ni. Sadin Mela taksaah hliam a awm nual niin an sawi.