Aitlanga harsatna chinfel thuai an phût

Mizoram Pradesh Congress Committee (MPCC) chuan thuchhuah siamin, Vairengte Aitlang rama huan neitu Mizote harsatna a rang thei ang bera chinfelsak turin Mizoram sorkar an phût.

MPCC chuan, Assam police ṭhahnem takin Aitlang, Vairengte ram leh ramri dep khaw hrang hranga Mizo chhungkaw tam tak innghahna leh eizawnna an tibuai tih tarlangin, "Innghahna leh eizawnna atana an hman mek ram zau tak min rawn hnehchhuh tâk avanga harsatna awm mek hi a rang thei ang bera chinfelsak thuai turin Congress party chuan Mizoram sorkar kan phût a ni," an ti.

Assam police-te'n Mizoram zau tak an awp beh tlat avangin Mizo huan siamtute'n hun eng emaw chen an huante an tlawhpawh thei tawh lo tih sawiin, "Huan ṭhenkhat phei chu Assam police-te'n an suasam hial a ni," an ti a; Assam police-te luah chin huam chhungah hmunphiah hmun siamtu Mizo chhungkaw tam tak an awm thu an sawi.

Mizoram hmun hrang hranga hmunphiah chíngtute'n hlâwk zawka an hmunphiahte an hralh theih nan ruahmanna fel tak siam ngei turin MPCC chuan sorkar an ngen a; mahaldar-te'n an duh thála hmunphiah rate an thunun loh nan leh hmunphiah thartute'n a lei to ngam bertute hnena an hralh ngei theih nan royalty (chhiah) tlem zawk siama kawng awlsam siamsak turin sorkar an phût tih an sawi bawk.