IT lama hmachhawpte sawiho

Information and Communications Technology (ICT) minister Robert Romawia Royte hoin nimin khan Secretariat conference hall-ah ICT leh a kaihhnawih department hotute'n information technology (IT) hmasawnna tura hmalakna leh hmachhawpte an sawiho.

Robert Romawia chuan, ICT chu department lian ni lo mah se, tunlai khawvelah a pawimawh hle tih sawiin, "Thawktute ṭan laknain hun hmasa lama ICT-in a tih ngai lem lohte pawh tihhlawhtlin a awm nual tawh. Kum thum liam ta chhung khan Mizoram IT Infrastructure Policy 2021 kan nei hman. MeSEGS pawh grant-in-aid system-ah hlan kai a ni a, tunah hian ICT hian sorkar department leh private organisation 338 zet website an host mek a ni," a ti.

ICT Minister sawi danin, IT Development & Training Centre 12 dinna turin ICT department-in cheng vbc. 11.88 hmanna tur DPR a siam a, centre pasarih tan cheng vbc. 6.93 sanction a ni tawh a, a dang panga tan sanction pawh hmuh belh beisei a ni.