Central aṭanga hamṭhatnate a dawngtu turte hnenah a thleng lo ṭhin - Governor

22nd January, 2022

Governor Hari Babu Kambhampati chuan nimin khan Power & Electricity department hotute Raj Bhavan-ah a kâwm a, kawlphetha siam leh intodelhna kawnga Mizoram sorkar hmalaknate a sawipui. Larsap chuan, sorkar laipui aṭanga hamṭhatnate department tam takin a dawngtu turte hnenah an thlentir lo ṭhin tih a sawi.

Hari Babu Kambhampati chuan, PE department chu kawlphethaah uar zawka mipui zirtir turin a chah a, "Tuna a lan dan chuan department tam takin sorkar laipui aṭanga hamṭhatna tam tak awm mek hi beneficiary-te an thlen ṭhin lo a, hei hi ṭan lak ngaihna lai a ni. Mipui zirtir kawngah theihtawp chhuah a la ngai hle," a ti.

Mizoramin kawlphetha a mamawh zat megawatt 171 chu tui luang chakna hmang leh nizung chakna hmanga siam theih a nih thu sawiin Governor chuan, "Harsa lo takin Mizoramah a siam theih tih a chiang a, kan hma lawkah solar power plant eng emaw zat leh small hydel project-te hman theih tura hawn a ni tur hi a lawmawm," a ti a; Mizoram hmabak a ên thu a sawi.

Inkawmnaa tarlan danin, 19th Electric Power Survey of India chhût dan chuan sorkar kum 2021-22 chhunga Mizoramin kawlphetha a mamawh zat chu megawatt 171 a ni a, central sector leh ISGS aṭanga Mizoram chanpual chu megawatt 213.14 a ni. Hemi hun chhunga Mizoramin kawlphetha a mamawh zat chu unit zawngin million unit 866 a ni.

Kawlphetha Mizoram mamawh zinga 90% chu central sector aṭanga lak a ni a; hruipui 132kV S/C Jiribam - Aizawl (PG), 132kV S/C Badarpur - Kolasib S/S - Aizawl (PG), 132kV S/C Kumarghat - Aizawl (PG) leh 400kV D/C Silchar - Melriat (PG), Sakawrtuichhun charged at 132kV aṭanga lak luh a ni.

Inkawmnaa tarlan ṭhenkhat
 Tun dinhmunah Mizoramah kawlphetha siam chhuahna small hydel project (SHP) 11 a awm.
 SHP 11 aṭangin kawlphetha MW 29.35 siam theih tura chhut ni mah se, siam chhuah tam lai berin MW 16 vel a ni a, ṭhál laiin MW 6-8 vel chiah siam a ni.
 Solar plant panga a awm mek a, ni êng lan ṭhat laiin a tam berah MW 5.50 siam theih beisei a ni.
 MW 8.70 siam thei tura ruahman SHP pali dang hman theih thuai beisei a ni.
 MW 20 siam thei tur Vankal Solar Park leh MW 10 siam thei tur Keifang Solar Plant chu kuminah hman theih beisei a ni.