FEMSE-in an hamṭhatna nawr an rél

Federation of Mizoram Samagra Employees (FEMSE), Aizawl Sub-Headquarter buatsaihin nimin khan Vaivakawn Branch YMA conference hall-ah FEMSE in an hamṭhatna tura ruahmanna awmte chak zawka nawr an rél.

FEMSE president R Lalnunhlima chuan, tun hnaiah School Education Minster-in Samagra fund bikah buaina a awm loh thu leh December 2021 hlawh pawh December chhunga pek an nih thu a sawi tih tarlangin, "Minister leh thawktute hmalaknaah kan lawm hle. Kan hma lam hunah pawh hlawh mumal taka kan lak zel kan beisei," a ti.

R Lalnunhlima chuan, Samagra Shiksha hnuaia thawkte hamṭhatna tur duang tura din Study Group-in an rawtnate sorkara an thehluh aṭangin kum a vei leh tawh tih sawiin, "Tun dinhmunah hmasawnna em em a la awm lo a, chak zawka nawr a ngai a ni," a ti a, a huna che chhuak thei turin member-te a chah.

Nimina FEMSE ṭhutkhawmah hian Aizawl district-a Assembly constituency tina MLA-te zawng zawng hmuh vek a, an harsatna tawh mek leh Study Group report a hlawhtlin theih nan hma lâkpui tura sawm an rêl a; Study Group report a hlawhtlin theih nan special fund khawn an rél bawk.

FEMSE tarlan danin, Study Group report-ah hian Samagra Shiksha hnuaia thawkte hlawh bakah, service lama an hamṭhatna tur awm thei te, an hlawh bikah regular employee-te basic pay bakah annual increment an lak ve theihna tur te, provisional employee-te anga medical allowance an dawn ve dan tur te, transfer an niha TA/DA an bill ve theihna tur te, seniority anga increment an dawn theih dan turte leh state regular employee emaw, contract employee emawa an luh ve theih dan tur sorkarin ruahmanna a siam a ṭul thute tarlan a ni.