2011 chhiarpuia Mizoram mihring zat aṭanga Covid-19 vei tawh zat 14.33%

January 20, Ningani khan Mizoramah Covid-19 vei mi 1,199 hmuh chhuah a ni a, Mizorama Covid-19 positive hmuh tawh zat 1,57,253 chu kum 2011 chhiarpuia mihring awm zat 1,097,206 aṭangin 14.33% a tling. Nimin khan hripui vei dam tawh mi 852 chhuahtir an ni a, mitthi an awm lo a, ni hnih chhung thi an awm tawh lo.

Covid-19 vei Ningania hmuh tharte chu mipa 628 leh hmeichhia 671 an ni a, RT-PCR hmanga hmuh 86, TrueNAT hmanga hmuh 45, RAT hmanga hmuh 1,046 leh FIA hmanga hmuh 22 a ni. Positivity rate chu 22.36% a ni a, mi 1,199 zinga mi 756-in symptom neiin, mi 443-in an nei lo.

Sample endikna district 11 zingah positivity percentage 10% aia a sànna district pakua a awm a, hun rei tak chhung 5% hnuai lama awm Kolasib district pawh 10% aia sang a ni.

IPR tarlan danin, Covid-19 positive 20 aia tam hmuhna khua/veng panga a awm a, Kulikawnah 26, Chhinga Vengah 20, Lengpuiah 25, Saichalah 81 leh Ṭawipui North-ah 26 hmuh an ni. Lengpui Airport-ah state páwn aṭanga rawn lut zingah Covid-19 positive mi 35 hmuh a ni a, screening point dang - Vairengteah mi 21, Kanhmunah 10 leh Tuivaiah mi paruk hmuh a ni bawk.

Nimin tlai dar 5 thleng khan hripui vei dam tawh mi 852 chhuahtir an ni a; district tina chhuak zat chu - Aizawlah 223, Serchhipah 201, Saitualah 119, Hnahthialah 74, Mamitah 55, Lungleiah 50, Champhaiah 49, Khawzawlah 42, Lawngtlaiah 16, Kolasib-ah 14 leh Siahaah pakua a ni.

IDSP record angin, Mizoramah Covid-19 vei 1,57,253 hmuh chhuah a ni tawh a, mipa 75,266 leh hmeichhia 81,987 an ni a, mipa aiin hmeichhia 6,721-in an tam zawk. Nimin tlai dar 5 thleng khan mi 1,48,182 (94.23%) chhuahtir an ni tawh a, mi 576 (0.37%) thi tawhin, enkawl mek mi 8,494 (5.40%) an awm.