Health Services building thar hawng

New Capital Com­plex-a Directorate of Health Services (DHS) building thar chu nimin khan Health minister Dr R Lalthangliana'n a hawng. DHS pisa thar hi cheng nuai 820 sênga sak a ni.

Dr R Lalthangliana chuan, Covid-19 léng karah Health department-in hma a sawn zel tih sawiin, "AYUSH department tan building sak vat a ni dawn a, district parukah hospital tihchangtlun a ni dawn bawk. Heng district paruk zinga pathumah khum 50 awmna leh district pathum dangah khum 50 aia tam awmna buatsaih a ni ang," a ti a; sorkar laipuiah chak taka hma an lak mek thu leh state matching share ngai loa neih a nih dawn thu a sawi.

Kolasib, Mamit leh Serchhip district hospital tihchangtlunna pawh bawhzui mek a nih thu sawiin Minister chuan, "Mamit district-ah phei chuan kut thlak a ni tawh. Civil Hospital, Aizawlah magnetic resonance imaging (MRI) khawl cheng vbc. 600 chuang man bun nan chak taka hmalak mek a ni a, neprology leh cardiology department tihchangtlun nan hmalak mek zel a ni bawk," a ti.

Hawnnaah hian Covid-19 Medical Opera­tional Team chairman Dr ZR Thiamsanga, MLA, Health secretary R Lalramnghaka, HFW principal director Dr F Lallianhlira, DHS director Dr H Lalchungnunga leh sorkar hotute an tel a ni.