Aizawl traffic jam nasa tihreh hi sorkar ngaih pawimawh ber zinga mi a ni - CM
Chief minister Zoramthanga chuan, Aizawl khawpuia kawngpui tâwt lutuk vanga lirthei chêt vel harsatna leh traffic jam nasa lutuk tihreh chu sorkarin a ngaih pawimawh ber zinga mi a nih thu a sawi.
CM Zoramthanga hi nimin khan Chief Minister's Office-ah Aizawl khawpuia kawngpui tâwt tihziaawmna tura ruahmanna siamtu tur Mott MacDonald Cunsultancy Firm hotute nen an inkâwm a, hmalakna tur hrang hrang an sawiho a ni.
Zoramthanga chuan, traffic jam nasa lutuk tihreh chu sorkarin a ngaih pawimawh ber zinga mi a nih thu sawiin, sorkar anga hma an lo lâk tawhnate leh ruahmanna an siam tawhte a hrilhfiah a; Aizawl leh a chhehvelte uluk leh chipchiar taka zir chiang a, mipui tana harsatna awm lo thei ang bera ruahmanna ṭha tak siam chhuak ngei turin duhsakna a hlan.
Chief Minister hi Urban Development and Poverty Alleviation department secretary K Lalthawmmawia leh director H Lianzela ten an ṭawiawm a ni.
Sorkar thuchhuah tarlan danin, October 26, 2021 khan sorkar laipuia Ministry of Finance hnuaia Department of Economic Affairs leh Asian Development Bank (ADB)-te chuan ADB loan US dollar nuai 45 hû project readiness financing (PRF) loan atan inremna thuthlung an ziak.
ADB loan hi Aizawl Sustainable Urban Transport Project (ASUTP) tana ruahman niin, Aizawl khawpuia kawngpui tâwt lutuk vanga lirthei chêt vel harsatna sutkianna tura ruahmanna hrang hrang siamna atan hman tur a ni a, hna thawktu atan Mott MacDonald thlan a ni.
Mott MacDonald hian January 2022 aṭanga kum thum (thla 36) chhung, December 2024 thleng hun an nei a, chumi chhung chuan zirchianna hrang hrang an kalpui dawn bakah, comprehensive mobility plan for Aizawl urban area leh detailed project reports (DPR) an peih tur a ni.
DPR chu Mizoram sorkar kaltlangin sorkar laipuiin a endik leh ang a, a tihhlawhtlinna tur sum a ngaihtuahsak bawk ang. Sorkar laipui chuan ADB loan US dollar nuai 45 aṭanga 90% chu Mizoram sorkar hnenah grant angin a pe dawn a, 10% chu loan angin a pe dawn.