Children's Science Congress

Science Teacher's Association, Mizoram (STAM) leh Samagra Shiksha, Mizoram chuan January 20-21, 2022 chhung khan School Education directorate conference hall-ah State Level Children's Science Congress vawi 29-na an buatsaih a, School Education minister Lalchhandama Ralte-in hmanpuiin, lawmman a sem.

State Level Children Science Congress-a thupui chu 'Science for sustainable living' tih a ni a, thupui hmangin zirlaite'n an thil zirbing project-te pholangin an intihsiak a, district hrang hrang aṭangin project 26 a lut a ni. December 13-17, 2021 chhung khan district level Children Science Congress neih a lo ni tawh.

Children's Science Congress-ah hian Minister Lalchhandama Ralte chuan, hmasawnna hna thawh ṭhinte zir chianna tel loa thawh a tam avangin a nih tur ang a nih loh phah fo tih a sawi. Lalchhandama Ralte chuan, child scientist-te chu ram leh hnam mamawh research ṭha nei zel turin a fuih a, hna an thawh hnuah pawh ram leh hnam mamawh chhanna ni tur leh, science lama thil an zir leh hmuhte au chhuahpui fo turin a fuih bawk.

State Level Children Science Congress-a ti ṭhate hi national level Childrens Science Congress leh Indian Science Congress-ah an tel dawn. Children's Science Congress-a tel turin zirlai 10 thlan an ni a, Indian Science Congress-a tel turin zirlai pahnih thlan an ni.