Special Court (Prevention of Corruption Act) chuan nimin chawhma khan chief minister Zoramthanga s/o Darphunga (L), Ramhlun Venglai thubuaiah a thutlukna a puang a, pakhatah thiam chantir (acquit) in, pakhatah a chhuah zalên (discharged) thung. Thutlukna puanna Court-ah hian Chief Minister hi a inlan a ni.

Thutlukna puangtu special judge (PC Act) Vanlalenmawia chuan, Zoramthanga puhna pakhat zawk, a huan Aii Puka sorkar bungrua dik lo taka hman chungchangah thuhretute thusawi aṭangin goat proof wire mesh (kel pal) leh angle iron post chu Aii Puk zau tan pek a nih ngei thu a sawi a, "He lai zaua huan neitute'n an chhawr a ni," a ti.

Vanlalenmawia chuan, Aii Puk Farm-a angle iron post leh kel pal dah chu a tirah CM Zoramthanga nupui Roneihsangi'n CM Addl PS Lalnunthianga hnenah sawiin, Agriculture director Dr OP Singh-a'n a pek thu a sawi a, "Pek theihna dan provision a awm a, a thlâwn leh thlawn loin pek theih a ni," a ti a, bungruate chu Aii Puk tan 50% subsidy-a pek a nih thu a sawi.

Special Judge chuan, ram neitute'n thing, mau leh thlaite rûkru laka a him theih nan an huan hungna atan kel pal leh angle iron post chu an hman thu sawiin, "A hmanna tur dik takah an hmang. Chu bakah, Agriculture department hian loneitu/huan neitute tan heng bungruate hi an pe thei tih a chiang bawk si a, thil dik lo awmin a lang lo," a ti. He thubuaiah hian Zoramthanga chu thiam chantir (acquit) a ni.

Zoramthanga a sum lak luh leh a thil neih inmil lo (disproportionate assets) chungchangah Special Judge chuan, "A tehna tur check period chu kum 2003 aṭanga 2008 inkar a ni. Hetah hian 2003 leh 2008 tawpa assets hlutna leh hemi chhunga an chhungkaw sum hman dante chhinchhiah tur a ni," a ti.

Vanlalenmawia chuan, PWD-in Zoramthanga immovable assets pasarih an enfiah thu sawiin, "Heng zinga panga chu check period hma lam, kum 2002-a siam zawh tawhte a ni," a ti a; Ramhlun Venglai leh Chaltlanga an in neihte chu a hlut zawng chhût ni mah se, check period hma lam leh hnu lama an khawih chin, sum sên zatte an sawi chian theih loh thu a sawi.

An chhungkaw account leh LIC-a sum an neihte zinga a ṭhen chu check period hnu lam a mite a ni hlawm tih sawiin Vanlalenmawia chuan, "Check period chhunga account aṭang chuan disproportionate asset a tling thei lo. Chuvangin, case hian pawimawhna a nei lo," a ti.

Special Judge chuan, thubuai chhuitu (case IO) ACB-a deputy SP Vanramlawma chu Court-ah ṭum thum a inlan thu sawiin, "Aii Pukah ṭum khat a cross a, disproportionate asset-ah chuan eng mah a cross lo. A hnuah hrisel lohna avangin a rawn inlan thei lo a, chuvangin Medical Board-ah ka refer. Medical Board-in endikin, doctor pathumin Court-a inlan turin fit lo an ti a ni," a ti.

Vanlalenmawia chuan, disproportionate asset-ah chuan finfiahna (evidence) a awm theih loh thu sawiin, "A pui tura ngaih EO (enquity officer) pakhat lahin a hriatpui loh thu a sawi," a ti a; Zoramthanga chu thiam loh chantirna tur leh thiam chantirna tur a awm loh avangin chhuah zalen a nih thu a puang a ni.