Solar study lamp 1,44,705 sem

Zoram Energy Development Agency (ZEDA) chuan National Solar Mission hnuaiah Jawaharlal Nehru National Solar Mission (JNNSM) kaltlangin Mizorama zirlai, KG 1 aṭanga pawl 10 thlengte tán solar lamp 1,44,705 an sem.

National Solar Mission hnuaia JNNSM scheme hnuaiah solar study lamp sem turin sorkar laipuiin July 2019-ah phalna a rawn pe a, School Education department leh social media kaltlangin dil theih a nih thu hriattirna an tichhuak a ni.

ZEDA hotute chuan, solar study lamp chu an beisei aiin diltu an tlem thu leh Covid-19 léng avangin a diltute pek kawngah harsatna an tawh thute an sawi a; study lamp chu 1,50,000 sem chhuah an tum laiin, hripui lêng avangin hun tiam chhungin sem an tum zat an sem thei lo tih an sawi bawk.

September 30, 2021 kha solar lamp pek theih hun tawp (project close) a ni tawh a, chuvang chuan sorkar laipuiin sem tura a phal zat Mizoramah sem theih a ni lo. Document tihfel hman tawh si, Lunglei, Lawngtlai leh Siaha district tana sem turte chu November thla hian sem chhuah leh an tum thung.

Solar study lamp hi IIT, Bombay siam a ni a, zirlaite'n a man pangngai aṭanga 15%, Rs 70 an cháwi a, a dang 85% chu sorkar laipuiin a tum thung. Solar study lamp hi India hmarchhak state-ah Mizoramah sem tam ber a ni.