Zoramthanga thubuaiah a ṭul anga Hmalak zui ngei kan tum - Vanlalruata

Zoramthanga laka thubuai thehluttu PRISM president ṭhin Vanlalruata chuan, chief minister Zoramthanga chu Aizawl District & Session Court-a Special Judge (PC Act)-in thiam chantir mah se, a ṭul anga hmalak zui ngei an tum thu a sawi.

Vanglaini palai zawhna chhangin Vanlalruata chuan, ACB chhuina aṭangin Zoramthanga'n thiam loh a chang ngei tura an ngaih thu a sawi a, "High Court pawh a awm a lawm le. Kan ngawi bo mai lo turah ngai ang. Eng emaw chu kan ti turah ngai ila. Chutianga thiam chantir ringawtte chu a dik lo. A ṭul anga hmalak kan tum," a ti.

Vanlalruata chuan ACB pawh demin, "Ngati nge case IO an thlâk mai loh. A service aṭangin a châwl tawh a, a chawlh hnuah chuan thlak mai tur a ni," a ti a, public prosecutor-te pawh an demawma a hriat thu a sawi.

Hetih lai hian, Zoramthanga laka thubuai thehluttu PRISM hi society angin an awm tawh lo a, political party-ah inletin, chumi hnuah MPC nen inzawmin, PC party an din tawh a ni.