MJA-in Lalbiakthanga Pachuau lawmpui

Mizoram Journalists' Association (MJA) Gen. Hqrs. chuan thuchhuah siamin, an member leh an president hlui Lalbiakthanga Pachuau-in Padma Shree (Literature & Education - Journalism) a dawng chu an lawmpui thu leh an chhuan thu an tarlang.

MJA Gen.Hqrs chuan, "Kan journalist pui, Pu Lalbiakthanga Pachuau-in India rama civil mi, ram leh khawtlang tana hna thawk leh mi chhuanawm bikte chauhin an dawn phâk chawimawina sang a dawng hi kan chhuangin kan ngai hlu tak zet a ni," an ti.

MJA tarlan danin, Lalbiakthanga Pachuau hi MJA Gen.Hqrs-ah term thum - kum 1985-1986, kum 1989-1990 leh kum 1991-1992 chhung president a ni tawh a, vice president term hnih leh secretary term khata ni tawh bawk. Kum 2014 khan MJA-in Prominent Journalist-ah a puang a, kum 2016 khan Mizoram sorkarin Prominent Press Representative-ah a puan bakah, Mizoram Press Accreditation Committee chuan India rama working journalist upa berah a puang a ni.

MJA Gen. Hqrs chuan, "Pu Lalbiakthanga Pachuau-in India President kut ngei aṭanga chawimawina sang a dawng thei ta chu MJA chuan a lawmpui a. Amah mai bakah a nupui Lalbiaksangi, ANS (Rtd.), a tu leh fate zawng zawng pawh lawmpuina chibai kan bûk a ni," an ti.