KHAWTHLIR

Governor leh CS
Chief secretary Renu Sharma chuan nimin khan Governor Hari Babu Kambhampati chu Raj Bhavan-ah a hmu a, Mizoram sorkar hmalakna hrang hrang leh thil pawimawh dang a sawipui.

Zawlpala Thlantlang hawng leh tawh
Phulpui Branch YMA chuan, Covid-19 lêng avanga hun eng emaw chen Zawlpala Thlantlang tlawh theih loha khâr chu November 6, 2021 aṭangin a duh apiang tlawh theiha hawn a nih leh tawh thu an tarlang. Zawlpala Thlantlang tlawh tura mipui an sàwm rualin, ei leh innate uluk taka senghawi ṭhin tur leh bawlhhlawh paih darh lo turin an ngen a ni.

Kuhva rah man
Assam Rifles leh Champhaia Customs department-te chuan nimin khan Champhai Zotlang huam chhungah kuhva rah ip 335 an man. Kuhva rah hi Rs. 91,45,500 hua chhût a ni a, Customs department-in an kawl zui a ni.

Zirlai tanpui
Siaha additional DC Abraham Beirazi Khithie kaihhruaiin nimin khan DC pisaah Poor Students Trust Society of Siaha District-in zirlai ṭanpuina pek tura a thlan mipa pathum leh hmeichhia pakhat hnenah ṭanpuina Rs. 30,000 ṭheuh hlan a ni.

Dampa bial tlawh
Deputy government chief whip Lalrintluanga Sailo, MLA bawk chuan nimin khan a bial Dampa chhunga Chhippui, Lallen, Parvatui, Saithah leh Phuldungsei khuate a tlawh a, tui leh kawlphetha dinhmun bakah sorkar hmalakna leh hmachhawpte a enfiah. Tunkar chhungin Marpara, Pukzing, Hnahva, Silsury leh Bekabekya khuate a tlawh leh ang.

Soft skill zirtir
Khawzawl bawrhsap CC Lalchhuangkima chuan nimin khan Khawzawl High School-ah Administrative Training Institute (ATI), Aizawl buatsaih sorkar hnathawk group B leh C mi 35-te tana chawlhkar hnih awh tur Induction Training Programme a hawng. Training-ah hian sorkar hnathawkte'n hlâwk zawka hna an thawh theih nan soft skills zirtir an nih dawn bakah, field visit neih a ni ang.