Court-a thiam chang Zoramthanga a lawm

Chief minister Zoramthanga chuan, hun rei tak a thubuai kalpui a nih hnuah judge-in a chhuah ta tih a sawi a, "Thiam min chantir ta hi lawmawm ka ti a, a dik ka ti a, ka lawm khawp mai," a ti.

Zawhna chhangin Zoramthanga chuan, a thubuaia thutlukna chu lungawithlak a tih thu a sawi a, "Thubuai kan neih kha tunah chuan thiam chantirin, acquit-in kan awm ta a, chuvangin ka lawm khawp mai," a ti a; thutlukna chu phú rênga a inngaih leh inngaih loh zawhna chhangin, "Phu rêngin ka inhria e. Court judgement hi a dik thlapah ka ngai," a ti.

Zoramthanga chuan, a thubuaiah eirûa inpuhna a awm loh hrim hrim thu sawiin, "Pakhat chu disproportionate assets tih a ni a, pakhat chu a thuneihna a hmang sual tih a ni," a ti bawk.