Chief Minister, minister leh MLA-te hi Pathian ṭihna nena hna thawk an ni - Lalchhandama Ralte

Nimin khan Mizo Hnam Runah chhung inkhawm neih ṭan leh a ni a, thu sawitu minister of state Lalchhandama Ralte chuan, "Chief Minister, minister leh MLA-te hi Pathian ṭihna nena ram rawngbawl hna thawk an ni," a ti.

Lalchhandama Ralte chuan, Mizoramin hun thim leh harsa a tawh laia CM ṭha tak a nei chu an vanneih thu sawiin, "Kan CM, minister, MLA-te hi min thlir ula, Pathian ṭihna nen ram rawngbawl hna thawk vek an ni. Kum 2023 inthlan lo awm leh turah MNF hotute hi uluk takin zir ṭhin se, kan CM leh Deputy CM phei chu fa lu hloh ṭhak khawpa an ṭhat lai hun zawng zawng ram tana pe an ni," a ti a; Pathianin MNF chu a tung ding zel dawn niin a sawi.

CM-in a sawi tawh angin, Covid-19 vangin cheng vbc. 2,800 zet sorkar laipui aṭanga hmuh a ni lo chungin ei leh bar, kawlphetha, tui leh thil dangah harsatna lian tham a thleng lo nia sawiin Lalchhandama chuan, "Kan hotupa ber hian Pathian bèl chungin ram a hruai a, a ding leh veiah pawh NGO leh kohhran hruaitute a hmang thiam a, a ṭhutpui ministry leh official-te a hmang thiam hle bawk. Opposition-ten social media-ah bei ṭhin mah se an nghing ngai lo," a ti.

Lalchhandama Ralte chuan Covid-19 dona chungchangah social media-ah sorkar beihna a tam tih a sawi rualin, "Hripui dona kawngah hian a ti ṭha ber state kan ni," a ti a; Mizoram chu Covid-19 vanga thi tlem ber state a la nih reng thu leh state dangah symptom nei chauh an test laiin, Mizoramah chuan contact tracing nen an inûm zui nasa a, hripui vei hmuh an tam phah niin a sawi.

School Education Minister chuan, Mizorama sorkar hnathawk zinga 30% vel chu Education department-a thawk an nih thu sawiin, "Education department hian hmel thar kan hmu nasa a, sorkar sikul siam belh rawtna a tamin enrolment ti pawh an pung nasa hle. Kan duh ang tâwk sum hmu lo mah ila, a awm sa kan hmang thiam a ni," a ti.