Lalbiakthanga leh C Kamlova hnenah President-in Padma Shree a hlân

9th November, 2021

Journalist Lalbiakthanga Pachuau (94), Chanmari leh C Kamlova (73), Mualpui, Aizawlte chu nimin khan President Ram Nath Kovind-a'n Padma Shree award a hlân.

Nimin khan Rashtrapati Bhavan, Delhi-ah Padma award hrang hrang semna inkhawm neih a ni a, Padma Vibushan, Padma Bushan leh Padma Shree-te hlan a ni. Lalbiakthanga Pachuau hi thu leh hla, zirna leh chanchinbu lam (Education and Literature - Journalism)-a thawh ṭhat vanga hlan a ni. Zoram Tlangau chanchinbu editor niin, Mizoram Journalists' President a nih tawh bakah, hun rei tak Association for Voluntary Blood Donation (AVBD) president a ni tawh a, Mizoram Social Defence Councilah hruaitu a ni tawh bawk.

Lalbiakthanga Pachuau hi kum 1945 khan British army hnuaiah Assam Regiment zawmin, Indopui Pahnihnaa Japan beihnaah pawh a tel tawh a ni. Sipai aṭanga a chawlh hnu kum 1953-ah Zoram  upuan chanchinbu a enkawl ṭan a, kum 1970 aṭangin ama chanchinbu Zoram Tlangau a enkawl leh ṭan.

MJA Gen.Hqrs.-ah term thum president a ni tawh a, MJA leh IPR department chuan kum 2016 khan India rama working journalist upa berah an lo puang tawh a ni.

Lalbiakthanga Pachuau hi Mizorama a thlawna thisen pek a tam theihna atana hma latu pawl AVBD dintute zingah telin, hun rei tak president a ni a; kum 1990 vel khan a hoin ruihhlo dotu pawl Mizoram Social Defence Union din a ni a, president hmasa ber a ni bawk.

C Kamlova hi a naupan lai aṭangin a pa sipai thawhna Arunachal Pradesh lama awm a ni a, a pa pension hnuah sipai hmun hrang hrangah lane boy niin, sipai bél leh pheikhawk nâwtin a inchâwm a, infi amna a theih avangin kum a tlin hmain sipaiah a lut.

Kum 1972-ah sipai aṭangin a chàwl a, Mizorama a awm hnuah lehkha zir zawmin, Hindi MA, M.Ed thleng a zir zo a; middle school leh high school hrang hranga a thawh hnuah kum 2008 khan RB Mahavidyalay principal a nih laiin a pension a ni.

Hindi thiam a pawimawhzia hriain a hun tam zawk chu Mizo zirlaite'n Hindi an thiam theih nan theihtawp a chhuah a, sorkar laipui pawh a dawr ṭhin. Hindi lama a hmalakna avangin chawimawina eng emaw zat a dawng tawh bawk.