COVID-19: Mizoram dinhmun ; Hripui vei 139 hmuh belh

November 7, Pathianni khan Mizoramah Covid-19 vei mi 139 hmuh chhuah a ni. Nimin khan hripui vei dam tawh mi 371 chhuahtir an ni a, hripui vanga thi mi pahnih an awm belh.

Covid-19 vei Pathiannia hmuh thar mi 139-te chu mipa 59 leh hmeichhia 80 an ni a, RAT hmanga hmuh chhuah vek an ni. ZMC laboratory, TrueNAT laboratory leh Fluorescent Immunoassay hmangin swab sample endik a ni lo.

IDSP record angin, Mizoramah Covid-19 vei 1,25,131 hmuh chhuah a ni tawh a, mipa 60,711 leh hmeichhia 64,420 an ni. Nimin tlai dar 5 thleng khan mi 1,19,583 (95.57%) chhuahtir an ni tawh a, mi 450 (0.36%) thi tawhin, enkawl mek mi 5,098 (4.07%) an awm.

Pathiannia swab sample endikna district paruk zingah Covid-19 positivity rate 10% chung lam leh hnuai lam district pathum ve ve an awm a; district panga - Siaha, Lawngtlai, Saitual, Khawzawl leh Hnahthial district-ah sample endik a ni lo.

Serchhip district-a sample pathum endik chu an positive vek a, positivity rate 100% a ni. Lunglei district-ah 20.69% leh Aizawl district-ah positivity rate 15.04% a nih laiin, Mamit (7.69%), Champhai (7.27%) leh Kolasib (2.94%)-te chu 10% aia a hniamna district a ni.

Mizorama swab sample endik bikah RT-PCR hmanga endik zat percentage a tlahniam hret hret zel a, Rapid Antigen Test (RAT) hmanga endik zat a pung hret hret thung. November 7, 2021 thlenga swab sample endik tawh 13,44,006 aṭanga RT-PCR hmanga endik zat percentage chu 23.52 a ni a, RAT hmanga endik zat chu 70.48% a tling. Hetih lai hian, sorkar laipui chuan sample endik zawng zawng aṭanga 70% tal RT-PCR hmanga endik turin state leh union territory sorkarte a lo hriattir tawh a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,25,131 chu mi 1,000 zelah hripui vei mi 114 an awm ang a ni a; mi 1,00,000 zela Covid-19 vangin mi 41 an thi tawh ang a ni. Nimin khan tlai dar 5 thlengin hripui vei dam tawh mi 371 chhuahtir an ni a; Aizawl district-ah mi 135, Lunglei district-ah 81, Mamit district-ah 62, Champhai district-ah 52, Siaha leh Lawngtlai district-ah 16 ve ve leh Kolasib district-ah mi pakua an chhuak.