ASF vanga vawk chánte zangnadawmna pêk tur leh tur loh sawi theih a la ni rih lo - AH&Vety Minister

Animal Husbandry & Veterinary (AH&Vety) minister Dr K Beichhua chuan, vawk hri African Swine Fever (ASF) vanga vawk chánte hnenah zangnadawmna pek tur leh pek tur loh sawi theih a la ni rih lo tih a sawi.

Dr K Beichhua hian nimin khan a pisaah thuthar thehdarhtute kâwmin, ASF vanga vawk chánte'n zangnadawmna an hmuh theihna tura an hmalakna a sawi a, "Hri avanga vawk suatte tana zangnadawmna pek theihna scheme chu central-in an nei sa a, hei hian kan zuk dil a ni. Statistics-te siamin kan zuk thawn tawh a, kan bawhzui reng a ni," a ti.

Vawk suatte tana zangnadawmna pek tur chu hmuh an inbeisei thu sawiin K Beichhua chuan, "Tukina kan thu dawnah chuan hmasawnna a kal tluang zel. Hmanhmawh thei anga hma min laksak an tum. Scheme-ah hian state leh central-in 50% ve ve an tum a ngai," a ti a; Mizoram chu state pachhia a nih avangin 90-10 tala tihsak turin central an ngen mek tih a sawi.

AH&Vety Minister chuan, ASF avanga vawk chánte'n zangnadawmna an hmuh theihna turin state sorkarin nunphung tikhaihlaka chhiatna thleng (calamity)-ah a puan phawt a ṭul thu sawiin, "Calamity-ah min puansak turin DMR depart­ment kan ngen a, ani'n thuneitu ber State Disaster Management Authority (SDMA) hnenah min thlensak a ni," a ti.

Dr K Beichhua sawi danin, SDMA hi Octo­ber 5, 2021 khan an chairman Zoramthanga, chief minister hoin an ṭhukhawm a, sum din­hmunin a zir loh avangin tun dinhmunah chuan ASF chu calamity-a puan rih loh an rêl a ni. Chutihrualin, SDRF atana central aṭanga sum hmuh belh dan Chief Secretary hoin AH&Vety leh DMR department ngaihtuah leh turin an ti a, anni hi an la ṭhukhawm lo.

Chief Minister-in ASF avanga vawk thi neitute hnena zangnadawmna pek theih ngei a duh thu a sawi nia sawiin K Beichhua chuan, "Tun dinhmunah chuan zangnadawmna pek theih a nih dawn leh dawn loh a la sawi theih rih loh. ASF hi calamity-a puan a nih pawhin zangnadawmna chu SDRF aṭanga pek tur a ni ang," a ti.

AH&Vety Minister chuan, Mizoramah ASF a lên lohna turin theihtawp an chhuah tih sawiin, "Kan dang zo ta lo a ni. Rilru a ngui vek a, tunah erawh rilru a hlim ve ṭan. Hri hian min kiansan beiseina sang tak kan nei. A tuartute tawrhna a rapthlak hle a, an rilru thlengin a nghawng ngei ang," a ti a; a tuartute dinhmun ngaihtuah chungin zangnadawmna a theih ang anga an ngaihtuah thu a sawi a ni.

Dr K Beichhua sawi danin, Mizoramah ASF vangin vawk 29,696 a thi tawh a, vawk 10,380 chu ASF vanga suat niin, vawk 526 chu ASF vanga thi nia rinhleh finfiah si loh a ni.