Tlabung kum 150-na lawm a ni

Tlabung khua chuan nimin khan Tlangliana Mual, Tlabungah an khaw kum 150-na an lawm a, Assembly speaker Lalrinliana Sailo-in a hmanpui. Speaker hian Tlabung kum 150 souvenir a tlangzarh a, Tlabungah helicopter service ṭan thuai a nih tur thu a puang.

Lalrinliana Sailo chuan, Tlabung chu khaw ropui tak, Mizoram kawtchhuah hmasa leh chanchin ṭha hrilna hmun pawimawh hmasa a nih thu sawiin, "Hnam hrang hrang inunau taka chenhona hmun a ni a, hun lo kal zel turah pawh ṭangrual takin ke pen zel ang che u," a ti a; ṭhalaite chu Tlabung khaw dinhmun chawikang zel tura mawhphurhna nei an ni tih hriaa zirnaa theihtawp chhuah tur leh ruihhlo laka fihlim turin a chah.

Bialtu MLA Nihar Kanti Chakma pawhin thu sawiin, Tlabung leh West Tuipui biala hmasawnna a thlen zel theihna turin a chhunga cheng mipuite ṭangruala theihtawp chhuah tlan a ṭul tih a sawi.

Mizo lalte kut aṭanga Mary Winchester (Zoluti) la let tura British sorkarin a tirh Thangliana (Lt.Col. TH Lewin) chu Khawthlangtuipuiah lawngléngin a chho a, November 9, 1871-ah Tlabung khua a thleng a, chu chu Tlabung khaw din ṭan hunah ngaih a ni.

Lawmna inkhawmah hian minister of state Lalruatkima leh sorkar hotu dangte pawh an tel a; Speaker leh amah ṭawiawmtute hian Bangladesh nena insumdawn tawnna tur Kawrpuichhuah Integrated Check Post an tlawh nghal a ni.