Sorkar laipui chuan Covid-19 dona atan state-te chu State Disaster Response Fund (SDRF) hman a phalsak. SDRF sum hi nikum 2020-21 pawh khan hman a lo phalsak tawh a, nikuma SDRF sum chu hman zawh a la ni lo.
Disaster Management & Rehabilitation (DMR) department hotute hnen aṭanga Vanglaini thu dawn danin, sorkar laipui chuan kum 2021-22 atana SDRF hnuaia sum dahte chu Covid-19 dona atan hman a remti a, sum ruahman zawng zawng aṭangin a zatve (50%) hman theih a ni dawn.
DMR department chuan sorkar laipui aṭangin SDRF sum an la dawng lo a; sorkar laipuiin a pek hunah Finance department-ah a lut phawt a, Finance aṭangin DMR department-in an dawng vel leh dawn.
Kum 2021-22 Mizoram budget-ah SDRF atan sorkar laipui chuan cheng vbc. 47 a ruahman a ni. Sum hi dawn a nih hunah Covid-19 dona atan thuneitute'n ṭul leh ṭha an tih angin sem chhuah a ni ang.
Kum 2020-21 khan sorkar laipui chuan Covid-19 dona atan SDRF hman a lo remti tawh a, a tìrah chuan 30% hman a remti phawt a, chumi hnuah 50% hman an remti leh a ni.
Kum 2021-22 budget-ah SDRF atana sum ruahman chu kum 2020-21 budget-a dah zat ang tho, cheng vbc. 47 a ni a; hmuh kim a nih chuan Covid-19 dona atan cheng vbc. 23.50 (50%) hman theih a ni ang.
Kum 2020-21 khan Mizoram sorkar chuan Covid-19 dona atan SDRF sum kawng hrang hrangah a hmang a, Health & Family Welfare department leh District Disaster Management Authority kaltlanga hman a ni deuh ber a, nimin thleng khan kum 2020-21 SDRF sum hman zawh a la ni lo.
2020-21 SDRF sum hmanna ṭhenkhat
# Quarantine facility dinna atan leh quarantine-a awmte enkawlna atan
# Covid-19 veia rinhlelhte swab sample lâkna leh endik tura phai lama thawnna atan
# Covid-19 hnu chhui (contact tracing)-na atan
# Doctor (microbiologist) leh volunteer rawih belhte lawmman atan
# Ramri leh airport-a screening tihna atan
# Invênna hmanrua leh medical bungraw ṭul zual leina leh a phurhna tur thlawhna hman man atan
# Thawktute mamawh zualpui leh thil dang ṭul atan
