ASF vangin vawk 4,561 thi tawh

Mizoramah vawk hri, African Swine Fever (ASF) lênna infected area 96 a awm tawh a, chu'ngah chuan nimin thleng khan ASF vangin vawk 4,561 a thi tawh.

Animal Husbandry & Veterinary (AH&Vety) department chhinchhiah danin, Mizorama district pakuaa khua/veng 96-ah ASF a léng tawh a, chu'ng hmun 96-ah chuan vawk 36,705 vulh report a ni. Vawk 36,705 zinga 4,561 chu ASF vangin an thi tawh a, vawk 32,149 a la dam.

Infected area pawn lamah chhan hriat lohin khua/veng 34-ah nimin thleng khan vawk 102 a thi tawh a, Khawzawl district-ah tam berin, khua/veng 12-ah vawk 25 a thi tawh.

Aizawl district-ah chuan ASF infected area-ah khua/veng 54 puan a ni tawh a, chu'ng zinga 47 chu AMC huam chhunga mi a ni. Lunglei district-ah ASF infected area 26 a awm a, Mamit district-ah pali, Serchhip district-ah paruk, Siaha district-ah pahnih, Lawngtlai, Khawzawl leh Hnahthial leh Champhai district-ah pakhat ṭheuh a awm bawk.