Scho' nghak hrâm hrâm turin chah

Mizo Students' Union (MSU) chuan thuchhuah siamin, Mizoram Scholarship Board (MSB) kaltlanga zirlaite scholarship sem tur chu an en zui reng tih an tarlang a, nghak hrâm hrâm turin zirlaite an chah.

MSU chuan, PFMS lama harsatna awm chu chinfel a nih theih nan hmalak reng a nih thu sawiin, "Hri lêng avangin thawktu an inkal chhâwk ṭhin a, zirlaite hmanhmawh angin file a kal chak thei lo. Finance department lamin a theih anga chakin tunah hian an kalpui reng a, MSU chuan ni tin a vil reng a ni," an ti a; pre matric scholarship sem mek a nia sawiin, zirlaite chu an bank account tiche ṭha turin an chah a ni.

Mizoram University hnuaia exam neih tur chungchangah MSU chuan, internet chungchanga harsatna awmte chinfel a nih theih nan hmalak reng a nih thu an tarlang a, "Hri léng karah khaw ṭhenkhata tower-te tihnun a ni lo tih kan hria a, power supply awm loh laia kháwl tinungtu tur hnathawk kalte chu harsatna siamsak lo turin khaw hrang hrang task force-te kan ngen a ni," an ti a; hripui laka inveng chungin zirlai exam turte harsatna thlen thei zawnga hma la lo turin khawtlang hruaitute an ngen.