Zirlaite tan ṭan la turin YMA-te ngen

Central YMA chuan thuchhuah siamin, online hmanga zirlai exam turte'n harsatna an tawh loh nan YMA sub-headquarters, group leh branch tinte chu an huam chhung ṭheuhah ṭan la turin a ngen.

CYMA chuan, YMA kumpuan hman mek chu 'Zirna uar' tih a nih thu sawiin, "June-July, 2021 chhunga online hmanga under/post graduate examination awm turah, kan huam chhung ṭheuha kan member-te'n exam ṭha taka an hmachhawn theih nan ṭan la ṭheuh turin kan inngen e. Zirlaite'n internet connection leh zirna atana ṭul dangte an neih ngei theih nan ṭan i la tlang ang u," a ti.

Central YMA chuan, "Online exam-ah hian paper-a an ziah, an chhanna an dah leh a ngai a, heta tana thil ṭul, paper lei/neih kawngah zirlaite’n harsatna an tâwk niin a lang," an ti a; YMA sub-headquarters, group leh branch-te chu zirlaite'n awlsamna an hmuh theih nan hma la ṭheuh turin an ngen a ni.

Covid 19 hripuiin thâ thlah mai a tum lo rih hle nia a lan avangin CYMA chuan YMA tinte chu an hmazawn ṭheuhah hripui donaa ṭang zel turin a chah bawk.