Nilaini-ah mi 44 man an ni

Aizawl district Covid-19 executive duty-te'n May 26, Nilaini khan khua/veng 13 leh containment zone hmun pali-ah The Mizoram (Containment and Prevention of COVID-19) Act, 2020 (Covid-19 Act) bawhchhia mi 44 an man.

Aizawl district-a Covid-19 hri darh zel tur laka invenna atana dan siam Covid-19 Act bawhchhia man mi 44 zinga 38 chu hmai tuamna (mask) vuah lo, SOP zâwm lo leh containment chungchanga dan siam zâwm lote an ni.

Mi 38-te chu AMC area veng 13 - Selesih, Ramhlun Vengthar, Ramhlun Sports Complex, Ramthar Veng, Edenthar Veng, Zarkawt, Dawrpui, Luangmual, Dinthar, Tuikual South, Mission Vengthlang, Bethlehem Vengthlang leh Venghluia mite an ni a; duty-te'n pawisa an chawitir tlingkhawm chu Rs. 10,100 a tling.

Nilaini khan Bethlehem Veng, Bethlehem Vengthlang, Tanhril Vengthar leh Bung­kawnahte containment zone huam chhung aṭanga chhuak ru, physical distancing zâwm lo leh hmai tuam lo mi paruk man a ni bawk a, pawisa chawitir zat chu Rs. 1,600 a ni.