KHAWTHLIR

Sample endik hun
Health & Family Welfare department chuan, Covid-19 vei, natna lang chhuak lote Rapid Antigen Test hmanga swab sample endik nawn hun chu, hripui an vei tih hmuh chhuahna swab sample lak ni aṭanga ni 10-ah a bithliah thar. Hun bithliah thar angin CCC-a awm mékte pawh buaipui nghal tur a ni. A hma chuan hripui vei, natna lang lote chu Covid-19 positive an ni tih hmuh chhuah ní aṭanga ni 10-ah sample endik nawn tura tih a ni.

Thisen pe
KṬP, Kolasib Vengthar Branch chuan nimin khan Kolasib District Hospital Blood Bank-ah thisen pek an huaihawt a, mipa 26 leh hmeichhia pangate'n thisen unit 31 an pe. Mahnia a thlawna thisen pe pakhat a awm bawk.

CHA ambulance Driver Covid kai
Civil Hospital, Aizawla lirthei khalhtu mi pangain Covid-19 an kai tih nimin khan hmuh chhuah a ni a, an zinga pathum chu ambulance khalhtu an ni. Civil Hospital hotute chuan, driver an indaih dawn lo hle a, mahse, Covid-19 vei hmuh chhuah an awm belh reng avangin an ambulance-te an châwl thei lo a, ruahmanna an siam nawk nawk a, vawiin lamah an awm zel dan tur an ngaihtuah ṭha dawn tih an sawi.

Car chesualah thi
Nimin zing dar 8:30 vel khan Kanghmun South khaw dáiah Toyota Fortuner MZ-01 U-7072 chesualin kawng thlanga a lum a, a khalhtu Lalnundika (23) s/o Lalnunfela, Kawrthah chu chetsualna hmunah a thi. Thenzawla Vantawng editor Liantluanga Renthlei hnen aṭanga thu dawn danin, lirthei hi parapet (tlak dâl) su tlangin kawng thlangah metre 90 vel a thui an lum a; mi pahnih chuang zinga pakhat zawk chu a hliam a, ngaihtuahawm erawh a ni lo.

Khelo India Centre thlang
Ministry of Youth Affairs and Sports chuan Khelo India Centre (KIC) atan Kolasib district-a Regional Sports & Training Centre, Football Academy leh Boys Hockey Academy, Kawnpuite a thlang. KIC enkawlna tur hian Sports Authority of India chuan Mizoram Sports & Youth Services hnenah Rs. 10,00,000 a pe dawn niin sorkar thuchhuahin a tarlang.

CM Relief Fund
Chief Minister's Relief Fund for Covid-19 ah nimin khan pawl/mimal palite'n Rs. 3,80,000 an chhûng lut a; petu zingah Evangelical Church of Maraland, Siaha (Rs. 2,00,000) leh ECM Aizawl (Rs. 1,00,000)-te an tel. Nimin thlenga CMRF for Covid-19 sum dawn tawh chu Rs. 23,55,28,954 a ni a, chung zinga Rs. 22,25,10,970 chu hman tawh niin, la hman loh Rs. 1,30,17,984 a awm.

Inhriattir turin ngen
Central YMA chuan, SRH-ZMC hnena kuang pek tum YMA branch-te chu CYMA-ah inhriattir hmasa turin an ngen. Nimina CYMA thuchhuah chuan, CYMA ngenna ngai pawimawha YMA branch eng emaw zatin SRH-ZMC hnena kuang an pe chu lawmawm an tih thu a tarlang a, "Mi dang tana kan luan chhuahnaah CYMA chuan lawmthu a sawi a ni. Tun dinhmunah ZMC-ah kuang dahna hmun remchang a tam loh avang leh thlaphànawma a lan tâk loh avangin YMA branch, kuang pe turte chu CYMA-a inhriattir hmasa turin kan ngen e," a ti.

Kawng siamtu tlawh
Lengteng bialtu MLA L Thangmawia chuan nimin khan a bial chhunga National Highway No. 6 (Seling - Champhai) kawng siamtu ANUSHA Projects hna thawhte hmun a tlawh a, an hotute a kâwm. L Thangmawia chuan, corporate social responsibility (CSR) aṭangin Kawlkulh PHC tana kháwl leisak turin a ngen a; ANUSHA Projects hotute chuan x-ray leh ECG kháwl leisak an tum tur thu an lo hrilh.

SRH-ah mi 20-in Ventilator hmang
Nimin tlai dar 5 dinhmun angin State Referral Hospital-ah Covid-19 vei mi 191 an awm mek a, an zinga mi 31 chu ICU-ah awmin, mi 20 chu ventilator nen enkawl mek an ni. SRH-ZMC Bulletin tarlan danin, SRH-ah hian nimin khan hripui vei mi 16 dah luh thar a ni a, mi 12 chhuahtir an ni thung. Enkawl mek mi 191 zinga 160 chu ward hrang hrangah an awm a ni.