University leh college zirlaite harsatna chinfel dan tur sawiho
Higher & Technical Education (HTE) minister Dr R Lalthangliana hoin nimin khan Secretariat conference hall-ah Covid-19 avanga Mizorama college leh university-te harsatna tawh sawiho a ni a, chinfel dan tur an rêl nghal.
Ṭhutkhawmah hian, hripui léng avangin hun rei tak chhung class pangngai kalpui theih a nih tawh loh avanga online class kalpui ṭhin a nih thu tarlan lan a ni a; college leh university zirlaite'n kum tina an chawi ṭhin fee pangngai chi hrang hrang bakah, online class kalpuina atan internet manah an insen nasat avanga harsatna an tawhte sawiho a ni. HTE Secretary hoin zirlaite tana zângkhai thei tur ang ruahmanna siam ni se, an ti.
Online class kalpui chungchanga harsatna chi hrang hrang zirlaite leh zirtirtute'n an tawh, a bikin internet connection leh power supply chungchang sawiho a ni a; Telecom chu sorkar laipui khawih (Central subject) a nih avangin state sorkar tan hmalak chak a har thu an sawi.
NH-54 zauh hna thawh a nih avanga optical fibre hmun tam takah tihchah a nih avangin internet connection-in a tawrh thu te, power supply mumal loh vanga mobile tower-in an tawrh thute tarlan a ni a; a theih ang anga hmalak dan dap an rél. Covid-19 Task Force on Mobile & Internet Services sorkarin a din thar dawn thu leh vawiinah hriattirna tihchhuah beisei a nih thu tarlan a ni.
Zirlaite lehkha zir lo thei lo, zir mumal hleithei si loa an awm chu an khawngaihthlak thu leh an rilru leh ngaihtuahna thlenga an tawrh thu sawi a ni. Zirlaite an khuaah an haw a, internet leh power supply mumal lohna hmun tam taka mite'n online class kalpuiah harsatna an tawh avangin, ruahmanna awmze nei zawk siam a, a ṭul anga State Executive Committee on State Disaster Management hnenah hma laksak tura thlen ni se, an ti.
Ṭhutkhawmah hian Information & Communication Technology, Power & Electricity, Higher & Technical Education department te, Mizoram University Registrar, College Principle Council, Mizoram College Teachers Association, Non-Government Colleges aiawhte leh MZU Student’s Council aiawhte an tel a ni.