Ram hruaitute an che chhuak mek

Covid-19 hripui léng leh inkhârkhip avangin ram hruaitute chu an bial chhungah ṭanpuina leh chhawmdawlna hna thawkin an che chhuak mek zel a; niminah pawh khan mi eng emaw zatin ṭanpuina an pe.

Health minister Dr R Lalthangliana chuan a mimal sum hmangin a bial chhunga damdawi-in, health & wellness centre leh health sub-centre 15-a hman tur hmanrua leiin a pe a, nimin khan Hnahthialah phurh thlen niin, sem nghal a ni. South Tuipui bialtu MLA hian Hnahthial Hospital hnenah Rs. 10,000 leh Hnahthial Lungleng Veng VTF hnenah Rs. 5,000 a pe bawk a ni.

Human Resources Develop-ment Board vice chairman L Thangmawia, MLA chuan nimin khan a bial, Lengteng huam chhunga tun hnaia Covid-19 vei panga leh chhungkaw 154 home quarantine mekna Kawlkulh a tlawh a, Kawlkulh damdawi-in (PHC)-ah hmanrua eng emaw zat leh Kawlkulh Joint VTF-ah Rs. 50,000 a pe.

L Thangmawia hian a bial chhunga khaw hrang hrang - Kawlkulh, Dulte, Puilo, Tawitawkawn, Changzáwl, Hliappui, Saichal leh Pàwlráng khuaa VTF-te hnenah hmanraw chi hrang hrang a pek bakah, Lengteng biala a ṭul anga hman turin Covid-19 laka invenna hmanrua chi hrang hrangte Ngopa SDO(Civil) hnenah a hlân bawk.

Congress Legislature Party (CLP) leader leh MPCC treasurer Zodintluanga Ralte chuan nimin khan Lunglei Electric Vengah Rs. 48,000 man PPE set 30 a pe.

Electric Vengah hian May 26, Nilaini khan Covid-19 positive mi 38 hmuh chhuah a ni a, khua/veng (VC/LC) mala hripui vei hmuh tam berna hmun a ni.

AMC executive councillor B Lalawmpuii chuan a bial, Ward-XIX chhunga community covid care centre (CCCC) leh local task force-te nimin khan a tlawh a, an mamawh chi hrang hrang eng emaw zat a pe a; LTF-te chu harsatna leh mamawh an neihte a hnena thlen zel turin a chah.

AMC Ward-XIX huam chhunga veng paliah nimin chawhma khan Covid-19 vei mek mi 551 an awm a; Chhinga Vengah 207, Dawrpuiah 79, Saron Vengah 201 leh Tuithiangah 64 an awm a ni.

AMC Ward-XVIII councillor Malsawmzuala Ralte chuan nimin khan a bial chhunga PHE department office pathum - Tuikhuahtlang leh Thakthing Venga mite a tlawh a, hna an thawhnaa hripui laka an invênna turin hmanrua ṭhahnem tak a hlân. PHE department hotute chuan, Covid-19 thawh hnihnaah tui sema chhuak ṭhin zingah hripui kái an la awm loh thu an sawi.