SBI Foundation-in Mizoram sorkarah PPE 600 an pe

State Bank of India (SBI) Foundation chuan Mizoram sorkar hnenah personal protective equipment (PPE) full set 600 a pe a, nimin khan Health minister Dr R Lalthangliana hnenah SBI Foundation aiawhin SBI regional manager LP Lalchangkima'n Secre­tariat-ah a hlân. PPE

an pek hi Rs. 8,61,000 man a ni.

Health Minister chuan, SBI leh SBI Foun­dation inpekna fakawm a tih thu a sawi a, "Kan mamawh hun takah zel in rawn che ṭhin hi a ropuiin a lawmawm tak zet. Covid-19 hripui léng donaah kohhran, páwl leh mimal inphalte zara thilpek kan dawng ṭhin hi a lawmawm a, hripui donaa thawktute pawh chakna thar min pe ṭhin," a ti.

LP Lalchangkima chuan, "Mizoramin a ma­mawh nia kan hriat ICU khum 100 chu CYMA nen ṭangkawpin SBI Foundation-ah kan dil mek," a ti a; SBI Foun­dation chu India ram puma SBI hnathawkte'n an phal anga sum an thawh aṭanga din a nih thu a sawi.

PPE set khat hi Rs. 1,435 man a ni a; set khat­­ah hmai tuamna (mask), face shield, mit vênna goggles, kutkawr, phei­khawk tuamna, lu tuam­na, suit leh a paihna tur (bag) a chhawm a ni.