Goal an chhuah hmasa a, minute 73 (hun pek belh nen minute 81 chhung chu player kim loin an khel bawk - mahse, Liverpool tlawm nan a la tling tawk zo chuang lo a, Anfield-ah Reds an tlawm phah lo.
Liverpool hian Inrinni zan khan Premier League inkhelah Fulham an mikhual a, 2-2 in an inhnehtawk. Merseyside club hian minute 11-na lekah si an phur fel der a, Andreas Pereira chuan Fulham tan goal hmahruai a khung.
Goal an chhuah aṭangin minute ruk a liam awrh a, Andy Robertson hnawhchhuah zui a ni a, player 10-a khelh a ngai zui - Anfield-ah Liverpool tan khua a var mawlh lo! Mahse, Cody Gakpo hmangin si phurh an sut a, Rodrigo Muniz-a'n Fulham tan khung leh mah se Diogo Jota chuan a sut leh bawk.
Player 10-a khel zawk Liverpool hi a nawrtu zawkah an ṭang a, Fulham an ṭang hleithei lo - hun a tawp meuh chuan player kima khel Fulham chu draw result-a lawm zawk an ni a, Premier League table-a Liverpool hmahruaina an tiderthawng pha lo.
Cottagers an tlangnel
Anfield-a inkhelah Premier League leh Champions League hmahruaitu Liverpool chu chak chiangsaa ngaih an ni a, mahse, Anfield-ah mualneitu team Reds-in an rin aia hmain goal an chhuah.
Pereira chuan minute 11-naah American fullback Antonee Robinson-a siamsak chu mawi zetin goal-ah a chantir a, Liverpool goalkeeper Alisson meuh pawhin tihngaihna a hre lo - goal ṭha bik a ni a, Liverpool an hawihai takzet.
Merseyside club vanduai a kaltluang laklawh. Minute 17-naah Andy Robertson chuan Harry Wilson a titlu a, Liverpool player hlui Wilson hi titlu lo se amah chauha tlang tur a nih tawh avangin Robertson a thiam lo a, Scottish defender hi red card pek a ni.
Minute 20 pawh a tlin hmain Liverpool-in si an phur a, player pakhatin an kiam bawk - centre back-ah midfielder ṭha mi Ryan Gravenberch sawn chhoh a ngai zui a, Reds tan 'comeback' a harsa tawh dawn tih a lang.
Mahse maw...
Anfield-a ni miau a, hnufual zawk ni mah se fans thawm a ring sawt a, player an phur belhchhah. A tlem zawka khel an ni tih hriat loh khawpin Liverpool an ṭang zui a, mahse, chawlhlawk hmaa si phurh sutna remchang a neih chu Luis Diaz-a'n a chhawr thei lo.
Liverpool-in kil tinah player ṭha an kawl miau avangin dan reng theih erawh an ni lo. Second half ṭan aṭanga minute hnihna lekah Gakpo a inlar a, Dutch striker hian Mohamed Salah-a ball cross ṭha zet chu tlu chungin a tauh goal - tun season-a goal kua a khungna chiah a ni.
Reds tan Salah a langsar chhunzawm a, mahse, Egyptian forward vanneih zan a ni lo - chance duhawm vawi hnih ngawt a hlah a, Fulham-in an hrem zui. Minute 76-naah Muniz chuan hmahruai nawnna goal a khung a, Anfield a ngawihtir.
Player kim loa khel Liverpool tan thawhleh chu harsa tura ngaih a nih laiin an tlawm lo chiang hle. Na takin Fulham an nawr chhunzawm a, bench aṭanga luhtir Jota chuan class zetin si phurh a sut - Portuguese forward hi October-a a inhliam hnua khelmuala kan hmuh leh hmasak ber a ni a, goal tawih hmangin a class min hmuhtir lehnghal.
Ennawm ropui
Liverpool-in player kim loa khel chungin ennawm ropui min chhawpsak a, Arne Slot leh a naute hian league hmahruaitu nih an phuzia min hmuh nawntir leh ta - Liverpool chak zawh loh zana Arsenal chak zo lo ve lehzelte chu Reds tana hah tidamtu pakhat a tling.
Merseyside club hian league match 15 khelh tawhah point 36 neiin hma an hruai mek a, anmahni hnaih bertu Chelsea aiin point ngain an sang zawk. Nizan khan Blues hi an khel a, he thuziak i chhiar meuh chuan Liverpool nena an inkar hi a danglam leh tawh mai thei.
Inrinni zana Everton nena 0-0 a inhnehtawk Arsenal-in point rukin Liverpool hi an la thlau a, match khatin an khel tam bawk! Tun hnaia an chet chhiat thu hahipa kan sawi Manchester City-in Manchester United an hneh chuan Gunners point hmuh ang zat an hmu ve leh der ang!
Liverpool tan vanduai zan pawha point hlawhchhuah a hlu a, second 61-na leka Robertson laka foul Fulham centre-back Issa Diop-a'n yellow card chauh a hmu chu an ui khawpin a rinawm - a êng zawnga thlir erawh chuan goal khung thiam Jota a dam a, Salah pawhin goal khung lo mah se, assist a nei hram a, champion turin Liverpool an ṭha tawk.
