Navas-a'n mittui nen a 'in' a thlah

Inrinni zan La Liga inkhelah Sevilla chuan 1-0 in Celta Vigo an hneh a, he inkhel hian danglamna tak a nei - Sevilla fachuam, an club legend Jesus Navas-a'n an club khelmuala a match hnuhnung ber a khelhna a nih vang a ni.

Kum 39 mi Navas hian kum tawp ruala inkhelh a chawlhsan tur thu a puang a, kum 2025-ah chuan Sevilla jersey nen a inlan tawh dawn lo - Inrinni zana Celta an mikhual hi Manchester City winger hlui tan Sevilla khelmual Ramon Sanchez-Pizjuan-a a match hnuhnung ber a ni.

Inrinni zanah team pahnih player-ten inkhelh hmain, 'Navas Legend' tih chuanna jersey an ha a, Navas hi guard of honour pein, Sevilla tana a nomawi chawi Copa del Rey (2), Europa League (4), Supercopa de Espana (1) leh UEFA Super Cup (1) te chu khelmualah hun chhuah a ni bawk.

City tan pawha Premier League (1) leh League Cup (2) chawitu Navas hian Spain tan match 56 khela goal nga khungin, World Cup 2010, Euro 2012 & 2024 leh UEFA Nations League 2022-23 nomawi a chawi.

Minute 20 a la awmin Navas hi lakchhuah a ni a, a chhuah dawn hian khelmualah ṭhingṭhiin, khelmual chu a fawp a, player anga lut leh tawh ngai lo turin a chhuahsan - Sevilla tan tun season-ah match 14 khelin goal khat a khung a, Spanish club tana a khelh chhung zawng hian match 702 khela goal 39 khungin, assist vawi 119 a nei.