Referee thutlukna dik lo tuartu Aizawl FC

I League-ah Mizo hlanga khel Aizawl FC an vanduai a, Inrinni khan Rajasthan United FC lakah goal khung hmasa mah se hun tawp dawna penalty vawi hnih an chawi avangin 2-1 in an chak lo. Victor Lalbiakmawia hoten khualmuala Namdhari an hneh loh zawhah an mualah Rajasthan an hneh loh zui avangin table hnuai lamah an awm.

RG Stadium-a inkhelah Aizawl FC leh Rajasthan United te an inngam ve ve a, ṭan phat aṭangin game a rangin inkhel a nung hle. Mizo club hian Shillong Lajong laka 8-0 zeta chak loh lakah point thum hlawhchhuah ngei an tum a, an phu angin goal pawh an khung rang.

Minute 11-na lekah Augustine Lalrochana cross ṭha chu Abhash Thapa-a'n an lamah a tilut. Aizawl FC winger Augustine-a nung chhunzawm a, mual dinglamah a hmuhnawm hle. Chutihrualin Lalbiakdika cross chu Augustine-a'n goal ruakah a khung thei lo.

First half tawp lamah Rajasthan an insiamṭha ṭan a, Uruguayan forward Lucas Rodríguez-a'n halftime hmain chance ṭha bik a hlah. Second half ṭantirhah pawh Spanish forward Alain Oyarzun-a ball pet chu keeper Joel B. Lalramchhana'n ṭha takin a dang.

Rajasthan hi dah hniam an thiang lo a, Mizo hlanga Aizawl FC an khelh laiin an hmachhawn team erawhin foreigner pali bul an ṭantir. Forward pahnih Lucas leh Alian te bakah Colombian midfielder Ronny Rodríguez leh Ecuadorian defender Ronaldo Johnson te an ṭangkai takzet.

Hun tawp lamah Aizawl FC talbuai deuh mah se an goal chhuahna erawh vanduai vang a ni thung. Vei lam aṭanga Rajasthan ball vawrhluh chuan Lalhrezuala kut a fuh thawi a, referee-in penalty a pe. Spanish forward Oyarzun-a'n minute 87-naah siphurh a sut.

Aizawl FC penalty chawi danah captain Lalchhawnkima a lungngawi lo a, a sawisel nasat avangin referee-in yellow card a pe. Injury time-ah Chhawnkima hian box chhungah Abhash a tih tluk avangin yellow card vawi hnihn a ahmu a, hnawhchhuah a nih bakah penalty a chawi.

Rajasthan captain Oyarzun-a'n penalty aṭangin chakna goal a khung a, injury time a nih tawh avangin Mizo club-in siphurh an sut thei tawh lo. Aizawl FC-in point thum hmuh theihna turah point an hlawhchhuak lo a, December 18, Nilaini zana Real Kashmir an mikhual hunah tlawm a thiang tawh lo ang.

Mizo tlangval Lalramdinsanga Ralte leh Lalramsanga te telna Real Kashmir hian nimin tlai khan player 10-a khel Namdhari chu 1-0 in an hneh lo. Goal awmchhun khungtu De chu second half-ah hnawhchhuah a ni.