Goal khung thiam lo Arsenal

Ball chan tam hi chakna ni ngawt lo a, goal khung tuma pet tam ringawt pawh point thum hmunna a ni chuang lo - point thum hlawh chhuak tur chuan goal khung chunga chak a ngai, he thil hi Arsenal tan a harsa tlat.

Inrinni zan khan Mikel Arteta nauten tun season Premier League bika ball an chan tam ber (77%) ṭum an tawng a, mahse an mikhual Everton lakah goal an khung theih miau loh avangin 0-0 in an inhnehtawk, point khata an lungawi a ngai.

Gunners hian hmahruaitu Liverpool chu point rukin an phak lo chhunzawm - Reds hian match khatin an khel tlem bawk, pahnihna Chelsea chuan nizan khan match an khel a, an chak chuan North London club nena an inkar an ti zau bawk ang.

Laipui puak lo

Emirates Stadium-ah mualneitu lamin tlarhma lamah Kai Havertz, Bukayo Saka leh Gabriel Martinelli te an tlar thei a, an hnungah Martin Odegaard, Declan Rice leh Mikel Merino ten an thlawp, an hming aṭang chuan goal nawr an tur an ni.

Mahse, goal hlauhawm nei hmasa erawh Everton an ni thung - Abdoulaye Doucoure chuan remchang a hmu a, mahse defender Gabriel chuan a lo dansak, a hnu lamah Arteta nauten inkhel an thunun hneh zui hle.

Captain Odegaard chu goal khung theihna hun nei a ni a, amaherawhchu Norway international midfielder hian goal zawnah a pet thei lo a, a hnua a pet ṭha tak chu keeper Jordan Pickford chuan a lo dansak bawk.

Saka pawh a 'Saka' thei lo. England international hian hlauhawm tak taka ball lakluh am nei ṭhin a, mahse a ṭhiante tan a siamsak theih loh bakah, ram tana a khelh pui Pickford a paltlang thei bik lo.

Tlarhma bil

Arsenal hian tun hnai season hnih chhung chu Premier League nomawi an chawi teuh ṭhin khawp mai, pahnihna ni chungin hun tawp an hmang ṭhin, an champion loh chhan langsar tak chu striker goal khung thei tak an nei lo niin an sawi.

Arteta-a'n nipui bazar laiin striker a lei lo a, forward Havertz chu tlathma laiah a ring lui - Germany international hi player ṭha tak chu a ni ngei mai, mahse inkhel inhnektawk leh pawimawh takah beisei a phak lo ṭhin.

Everton lakah pawh Havertz a hriam lo, hun tawp dawn lama rawn lut Gabriel Jesus pawhin goal a pai tel lo, match 23 chhung chu goal khung loin a awm ta, striker tan chuan hun duhawm lo a ni chiang.

Corner hmang thiam an ni a, amaherawhchu Toffees an inveng thiam bawk si - November thla hnu lamah Arsenal hian corner aṭang lo chuan league goal khung an la nei lo, siamṭhat an ngaih lai chu chiang takin a lang a ni.

Chak phu?

Inkhelh banah Mikel Arteta chuan hnehna chan phu zawk an nih thu a sawi. Gunners manager Arteta chuan, "Kan chak zawh loh avangin lungawi a harsa, team pakhat chauhin hnehna chan phuin an khel, chu team chu keimahni kan ni.

"Kan inveng ṭha em em a, kan khingpuite khan hlauhawm taka min nawr pawh an nei lo, kan chang chep hneh hle. Khatiang baka ṭha a khel tur khan ka naute beisei ngaihna ka hre lo, mahse kan mutan pakhat hi chu kan paih bo a ngai," tiin goal an mamawh tih a sawi.

An match hnuhnung zawkah Arsenal hi Fulham nen goal lut lo bawkin an inhnehtawk, season kal laia match 16 an khelh tawh hoah a zatve ngawt chu chak ni hmel hmuh loh an nei, vawi hnih tlawmin ṭum ruk an inhnehtawk.

BBC tarlan dan chuan, thlasik bazar inhawn hunah Arsenal hian striker lei tur an dap dawn, an sawizawm zingah Newcastle United striker Alexander Isak leh Juventus striker Dusan Vlahovic te an tel, a tu emaw zawk la tur erawhin sum an hman huai a ngai khawp ang.

Dyche a fing

Arsenal hlauhawmna lai hrang hrang a hria a, chumi veng tur chuan Everton coach Sean Dyche chuan a veng turin a naute a rem, minute 90 chhung an ṭang tluan thei a, chak lo tur zawka ngaih ni mah se khualmual aṭangin point an hlawh chhuak.

Dyche chuan, "Engtiangin nge kan khingpui ten ball an kalpui tih hi kan hriatchian a pawimawh. Emirates Stadium-ah chuan ball chan tam a, inkhel thununtu zawk nih chu tum chi a ni lo, a bik takin kan team tan chuan a remchang lo.

"Kan tih theih chu mual sir aṭanga ball an cross lut tur lo danchah a ni. Ashley Young leh Vitalii Mykolenko te khan an hna an tlin em em a, anni khan an lo dangchat zel, kan thil tum leh ruahmanna a hlawhtlin theih nan an thawhhlawk," a ti.

Everton hian league match 15 aṭanga point 15 hmuin table-ah 15-na an ni mek, season an hman ṭhat tawk lohna an siamṭha chho mek a, an dinhmun hi ṭha tak la ni chiah lo mah se tun hnaiah hma an sawn avangin beisei an nei sang zel ang.