Real an chak zo lo leh ta!

Tun season zet zawng Real Madrid an che fuh hleithei lo a ni ber mai - hmahruaitu Barcelona tlan pelh theihna remchang an neihah an tlansan thei lo a, Inrinni zan khan Rayo Vallecano chu khualmualah 3-3 in an inhnehtawkpui.

Mualneitu Vallecano hian 2-0 in hma an hruai hman hial - Unai Lopez leh Abdul Mumin hmangin goal an khung hmasa a, Real hian Federico Valverde leh Jude Bellingham hmangin si phurh an sut.

Rodrygo hmangin hma an hruai zui a, mahse, Vallecano hian Isi Palazon hmangin si phurh an sut ve leh a, 3-3 in inkhel a tawp. Real hian khelh zat inangah point khatin Barca an phak lo a, Catalan club hi nizanah khan inlanin, an chak chuan point tam zawkin Real an tlansan ang.

Atletico Madrid pawh sawi hmaih an thiang lo. Diego Simeone-a naute hi nizan khan Getafe nen inhmachhawnin an result kan hre hman lo - an chak chuan Real hi point khatin an tlan pel ang a, pahnihna dinhmun an luah thei dawn.

Inkhel hmuhnawm

Madrid khaw club-in Vallecano lakah hliam vangin Kylian Mbappe an chhawr thei lo a, an tuar lutuk lo tura an inngaih laiin goal an chhuah hma - minute lina lekah Unai Lopez chuan Jorge de Frutos-a siamsak chu goal hmahruai ni turin a khung.

Real an tho mai lo - Abdul Mumin chuan minute 36-naah an hmahruaina a belhchhah ve leh a, Carlo Ancelotti leh a naute mikhual khelmualah an hawihai. Mahse, minute thum hnu lawkah Valverde chuan mawi zetin si phurh a sut ṭhen a, Real an phur sawt.

Si phur saa chawlhlawk hman duh loin Jude Bellingham a inlar a, tun hnaia 'form' em em mai, English midfielder hian si phurh sutna goal chu minute 45-naah a khung.

Kum 21 mi midfielder hi season ṭantir lamah beisei a phak loh avangin sawisel a hlawh hman viau a, mahse, a hunah tak par a chhuang tiin a sawi theih - a match hnuhnung pariatah goal sarih ngawt a khung ta.

Beiseina thamral

2-2 in chawlhlawk hman a ni a, Estadio do Vallecas-a inkhelah hian Real-in second half-ah na takin an rawn nawr let tura ngaihna a lian hman hle. Madrid khaw club hian goal pawh an khung hmasa ta zawk.

Minute 56-naah Rodrygo chuan mawi zetin an hmahruaina goal a khung a, an chak ngei rinna a lian hman. Mahse, Vallecano-in Real laka tlawm an lo duh bik lo a, Isi Palazon chuan minute 64-naah si phurh sutna goal a khung ve leh.

Real tan hliam damkawr, bench aṭanga luhtir Vinicius Junior chuan chakna goal khung theihna remchang a nei a, mahse, Brazilian forward shot ṭha tak chu Vallecano keeper Augusto Batalla chuan a lo dang.

Hun tawp thlengin goal dang a lut lo a, Real-in nizana inlan Barca tana pressure pekna remchang an neih an chhawr lo. Madrid khaw club hian Nilaini zanah tun season aṭanga khelh ṭan FIFA Intercontinental Cup final an khel zui dawn a, Mexican club Pachuca nen an inkhel ang.