AFC Futsal Level 1 Coaching Course an zo fel

Mizoram Football Association leh All Indian Football Federation ṭangkawpin an buatsaih AFC Futsal Level 1 Coaching Course kharna chu December 14, Inrinni zan khan R. Dengṭhuama Indoor Stadium, Mualpuiah hman a ni. Course kharnaah hi MFa president Lalnghinglova Hmar-in a telpui a ni.

Coaching Course hi December 9, Thawhṭanni aṭang khan neih ṭan a ni a; Theory Class hi Govt Aizawl College New Campus, Mualpuiah neih niin, Practical Class hi R. Dengṭhuama Indoor Stadium, Mualpuiah neih a ni thung.

India ram hmun hrang hrang aṭangin coaching course hi mi 17 an chhim a, course instructor chu Indian National Futsal Head Coach & AFC Futsal International Tutor Joshuah Vaz a ni. A kharnaah hian MFA President bakah MFA honorary secretary Lalrengpuia, MFA finance secretary LV Lalthantluanga leh MFA Exe. Member Hmingthansanga ten an hmanpui bawk.

MFA chuan course buaipuitute hnenah lawmthu sawina thilpek an hlan. Course buaipuitute hi Joshuah Vaz bakah asst instructor Veerababu Sivaneni (AIFF Coach Educator & AIFF Futsal Scout) leh observer Koncho Tashi (Asst Manager India National Futsal Team) te an ni.