A chung ber chu Bagan awmna hmun

Inrinni zanah ISL match hnih a awm a, inkhel hmasa zawkah Bengaluru chuan 2-2 in FC Goa an inhnehtawkpui - he inkhel result hre sa hian Mohun Bagan an inlan ve leh a, an elpui ber Bengaluru chak zawh loh zanah Kerala Blasters chu 3-2 in an hneh.

Bagan-in hnehna an chan avangin table chung ber an luah a, anmahni hnaih bertu Bengaluru aiin point hnihin an sang zawk a, match khatin an khel tlem zawk bawk - sum ngah Kolkata club an kal fuh rih hle.

Inrinni zan inkhel hmasa zawkah Bengaluru hi FC Goa lakah 2-0 in an hnufual hman zawk! Goan club hian an mikhualna ramah Sandesh Jhingan leh Sahil Tavora hmanga goal khungin, 2-0 in hma an hruai.

Mahse, Bangalore club hian minute 70 hnu lamah Ryan Williams leh Jorge Pereyra Diaz hmanga si phurh sutin, point khat an hlawh chhuak leh hram thei. Bengaluru-a inkhelah hian Goa tan Dinthar tlangval Ayush Chhetri chuan inkhel bul a ṭan.

Bengaluru chak zawh loh hnuah Bagan an inlan a, Jamie Maclaren hmangin Kerala Blasters lakah goal hmahruai khung mah se, Jesus Jimenez leh Milos Drncic hmangin South Indian club hian an chhanglet a, 2-1 a nih avangin Kolkata club an chi ai hman.

Mahse, sum ngah leh players nei hrawl Bagan tan Jason Cummings chuan si phurh a sut a, hun pek belhah defender Alberto Rodriguez chuan chakna goal a khung zui!

Bagan tan midfielder ṭha mi Lalengmawia Ralte (Apuia) chuan inkhel bul a ṭan a, Blasters tan midfielder Freddie Lallawmawma chuan inkhel bul a ṭan ve bawk.

Kartawp ISL inkhel dangah, Zirtawpni zan khan Jamshedpur FC chuan 2-1 in Punjab FC an hneh bawk. Khalid Jamil-a enkawl JFC tan Javi Siverio chuan goal hnih khungin, Punjab tana Ezequiel Vidal goal khung chu scoreline cheimawina chauh a ni.