Pool championship zo fel

Mizoram State 10 Ball Pool Championship 2024-2025 chu Inrinni tlai khan zawh fel a ni a, PB Liansangzuala, Dawrpui veng a champion.

Nomawi inchuhna inkhelah PB Liansangzuala hian a khingpui Zonuntluanga, Electric Veng nen hmuhnawm taka an inkhelh hnuah, 8-4 in a chak zawkah a ṭang ta a ni.

Final hi Race to 8 (frame 8 la hmasa sa chak) a khelh a ni a. Frame hmasa ber Tekawka'n a la a, a dawtah PB-a'n a la ve a, frame thumna Tekawka'n a la leh thung. Frame lina aṭangin PB-a'n frame 8-na thleng, frame nga a la zawn.

Frame dinhmun 6-2 a ni a, Tekawka'n frame 9-na leh 10-na a zawnin a la leh a, 6 -4 a ni chiah a, chumi hnuah, PB-a lo tho chhuakin, frame 10 leh 11-na a zawnin a rawn la a, frame dinhmun 8-4 a ni ta a ni.

Mizoram Snooker and Billiards Association (MSBA) buatsaih Mizoram State 10 Ball Pool Championship hi December 9 aṭang khan khelh ṭan a ni a, player 40 chuang an tel a, MSBA Hall, Hawla Indoor Stadium, Pitarte Tlang, Republic Vengthlang-ah khelh ṭhin a ni.