GIG Motors MFA All Mizoram Inter Village Football Tournament 2024-ah inelna ṭantirh aṭanga khel mawi ber Kolasib Town an champion. MFA buatsaih Mizoram pum huap inelna hi ṭum hnih neih a ni tawh a, Aizawl khaw pawn team ve ve an champion. Inelna neih hmasak ber ṭum khan Champhai Kanan an champion thung.

Inter Village Football final hi December 12, Ningani zan khan RG Stadium-ah khelh a ni a, beisei angin mipui pung khawm tam lo mah se inkhel erawh a ropui thlawt. Kolasib Town leh Ramhlun North te hun pangngaiah 2-2 in an inhnehtawk a, extra time-ah goal khat ve ve khung belhin penalty shootout-ah Kolasib 5-4 in an vannei ta zawk.

Kolasib hian feet nga zeta sang nomawi bakah nuai hnih leh sial an dawng a, fairplay award an dawn zarah Rs 50,000 an dawng tel. Team khaipa Paul Ramfangzauva chu best player a thlan niin goal riat khung thei mi panga zinga khel tlem ber Thenzawl Jt forward F. Lalhmangaihsanga'n top scorer chawimawina a dawng thung.

Final boruak sang

Final-ah Kolasib rinkai zawk ni mah se Ramhlun North-in bul an ṭan ṭha zawk. Coach H. Lalremruata hoten goal venhim tum loin na takin an nawr a, Mizoram Police striker F. Lallawmkima a nung ṭha hle.

Minute thumna lekah V. Vanlalhriatrenga through ball pek chu Lawma'n chak taka um lutin Kolasib defender Lalrintluanga'n (Tuka) a um pha lo a, goalkeeper chauh a hmachhawn hnuah ṭhiante pek tum vangin defender Melory Laldinsanga a rawn inrawlh hman.

Kolasib tlarhnung an che fuh lo zui a, Lawma bawkin su tlangin goal khungna remchang a nei lehnghal. Mahse, referee-in foul a lo ham hman a, freekick a pe zawk. Ramhlun North an lungawi lo.

Kolasib nge nge

Final-ah Kolasib-in ṭum dang pha lo mah se an insiamrem hnuah erawh an chungnung hle. Paul Ramfangzauva'n midfield-ah ball a sem a, a kawppui F. Lalruatfela leh PC Pazawna ten an thlawp ṭha.

Ṭum dang zawng aiin Police winger Isaak Malsawmkima a hmuhnawm bawk. Minute 32-naah William Lalnunfela leh MS Dawngzuala ten Ramhlun North tlarhnung an ṭhiat a, Dawngzuala cross chu keeper Lalchhanchhuaha Sailo-in dang mah se a per chu PC Pazawna'n remchangah a la a, a hun ṭha neih chu chiang takin a pet goal.

Minute 40-naah Kolasib-in mawi zetin Ramhlun North tlarhnung anṭhiat nawn a, Isaak-a'n Ramhlun North defender kap karah petin Paul Ramfangzauva'n changin, Martin Lalhmingtluanga'n dang mah se a per chu Paul bawkin changin inringtawk takin a luin a tauh per hlek a, chiang zetin a volley goal.

Khelmual chhunga hmuhnawm ber Paul-a chevel a hmuhnawm thlawt a, goal hmaah a hriam tel avangin danglamna thlentu a ni. Chutihrualin Kolasib-in goal an khung belh mai loh avangin Ramhlun North-in beiseina an neih phah.

Ramhlun North hun

Ramhlun North-in goal hnih an chhuah avangin risk an lak a ngai tih an hria a, kut hliam vanga bench-a an dah midfielder ball thiam Lalremtluanga (Mamatea) an luhtir nghal.

Second half ṭantir lamah boruak a dang ta daih. Minute 52-naah Lawma'n hla tak aṭangin a pet a, goalkeeper Lalrinzuala'n a dan per avangin Rodinmawia'n si phurh a sut ṭhen. Ramhlun North an phur chhunzawm a, an vannei tel bawk.

Kolasib defender Tuka a chesual a, Ramhlun North winger Lalnunsanga'n pressure a pe na ve bawk. Nunsanga'n la lutin amah thlawptu Lawma tan a pe a, Police striker hian fing takin Paul-a lakah penalty a hlawh chhuak. Lawma'n ball la nghalin penalty a pet a, keeper Rinzuala bumin si phurh a sut zo.

A 'hot' zel

Kolasib-in hun rei lote chhung an mutthluk an tuar a, second half tawp lamah rawn insiamṭha leh mah se goal khung an harsat tawh. Ramhlun North ṭantute thawm a ring a, chak tur rin thiam a har leh ta hle.

Minute 90 chhung chak zawk an awm lo a, extra time-ah Ramhlun North an muthlu ve ta thung. Ṭan phata'n Kolasib winger Isaak-a'n mual vei lamah ball a khalh phei a, Pazawna ball pek chu substitute RM Zothansanga'n a pet goal. Team goal mawi tak a ni.

Ramhlun North-in goal an mamawh a, mah se Kolasib-in inrintawkna an nei tawh. Kolasib-in ball an thiam a, inkhel an thunun a, Ramhlun North an che thei lo.

Mahse, hun tawp lamah Ramhlun North fapa chuam tia sawi ṭhin V. Lalchhuanawma a rawn lut a, vanneihna a rawn keng tel. Chhuantea'n tlarhnung aṭangin ball a vawrh lut thei a, corner kick an hlawhchhuah phah. Corner kick hmang ṭangkai lo mah se throw in erawh an hmang ṭangkai a, Ramhlun North tan extra time-ah pawh injury time-ah Mamatea'n box chhung aṭangin kawh zetin a pet goal.

Chak chiang tawha inngai Kolasib an hawi hai a, goal khung lehna hun a awm tawh lo. Penalty shootout hmangin chak zawk zawn a ngai a, chak tur a chiang tawh lo.

Panenka!

Penalty shootout-ah Ramhlun North-in an pet hmasa a; Lawma, Martin leh Chhuantea ten ṭha taka an pet vek avangin Kolasib-in pressure an ngah zawk a tih theih.

Chutihrualin Kolasib tana pettu hmasa Paul leh substitute C. Lalropuia ten an pet ṭha ve ve. Pathumnaah left back hmuhnawm Stephen Lalrinfela a rawn pen chhuak a, pressure sang viau mah se cool zetin goal laiah a pet a, keeper Chhana a bum chiang hle.

Panenka hmanga Stephen-a'n goal a khung vangin Ramhlun North-in pressure an ngah leh ta zawk. Ramhlun North goal hmahruai khungtu Dinmawia a rawn pen chhuak a, a pet paha a tawlh tluk avangin keeper Rinzuala'n a dansak.

Kolasib tana F. Lalruatfela'n a pet goal hnunah tun inelna tluana khel ṭha Vanlalhruaia a rawn pen chhuak a, player thawkrim Mahruaia hian Ramhlun North tan goal khung mah se Kolasib dinhmun a ṭha tawh zawk.

Police winger Isaak-a'n a tawpna ber rawn petin keeper Chhana bumin champion-na goal a khung. Kolasib-in final boruak sangah ṭum dang angin khel ṭha tawk lo mah se an phu ang ngeiin hnehna an chang.

Kolasib Jt coach Lalchhuansanga chuan, "Kan inlungrualna rah a ni a, kan thawh hona ṭhat vang liau liau a ni. Inchhuanna tur kan nei lo a, kan champion hi Kolasib football tan a ni e," tiin Vanglaini a hrilh.

Kolasib hian champion an phu a, final-ah chak harsa deuh mah se final kalkawngah harsatna an tawk lo. Champion turin Kolasib hian goal 40 an khung a, goal li chauh an chhuah. Football mawina keng tel chunga an hlawhchhuah feet nga chuang zeta sang nomawi hian Kolasib-ah football a tihnun thar leh phah ngei ang.