Chetsual reng a remchang lo - Conte

Serie A hmahruaitu an nihna an hloh hnuah Napoli coach Antonio Conte chuan, an tan chetsual a remchang tawh lo tih a sawi chhuak - zanin dar 10:30 hian Udinese an lenchilh ang.

Napoli hian Serie A an match hnuhnung berah Lazio chu 1-0 in an ngam lo, league lama an hneh loh Lazio tho hi Coppa Italia last 16-ah 3-1 in an ngam lo bawk, tun hnaiah an che fuh hleithei lo.

Italian manager Conte chuan, "Season tluana khelh ṭhat tlang vek chu thil theih a ni lo a, chetsual leh tlak hniam ve deuh lai chu a awm ṭhin, chutiang hun aṭanga tal chhuah theih chu thil lawmawm a ni thung.

"Tluk hnua thawh leh theih hi a ropui lai a ni a, chu chu keimahni pawhin kan tum tur a ni ang. Inelna kan hmachhawn a nih chuan champion kan tum ngam tur a ni a, chumi tur chuan chetsual reng a remchang tawh lo," tiin a sawi.

Napoli inkhelh hmain hmahruaitu Atalanta chu Cagliari mualah an lenglut dawn a, an inthlauhna hi point hnih chauh a nih avangin match khat chetsual lekah Atalanta leh Napoli te dinhmun hi a la inthlak thei reng.