Slot-a'n Nunez a chhan

Liverpool boss Arne Slot chuan season duhawm tak an hman karah, striker Darwin Nunez-a'n beisei phak lo mah se a chhan a, Uruguayan striker chu, "Goal-ah ringawt ka teh ve lo," tiin a sawi.

Kum 25 mi Nunez hian tun season inelna hrang hrangah match 19 khel tawhin goal thum chauh a la khung a, assist vawi hnih a nei. Pound maktaduai 90 chuang man striker hnathawh atan chuan a ṭha tawk lo hle.

Mahse, Slot chuan, "Darwin hian team tan a thawhhlawk hle. Keimahni chauh ni lo, amah ngei pawhin a duh khawp ang zan goal a la khung lo ang tih ka ring a, mahse, team tana a thawhrimna hian kan team-ah nghawng ṭha tak a nei a ni.

"Goal tam tak khungtu team-ah a tel a, a goal khung hmang chauhin Darwin hi ka teh ve lo," a ti a, Benfica striker hlui hian a pu rinna hi goal hmang ngeia chhanlet erawh a châk khawp ang.

Hetihlai hian Liverpool-in chanchin lawmawm an nei a, goalkeeper Alisson a dam chian tawh hnuah Diogo Jota leh Federico Chiesa ten dam lam an pan leh tawh. Reds-in zanin dar 8:30-a Fulham an mikhual huna inlan thei dinhmunah an ding mek.

Jota hian October thla tawp khan Chelsea lakah a nakruhah hliam neiin a la inlan leh lo a, a inhliam hma hian tun season-ah match 10 khelin goal li a khung hman a, assist vawi hnih a nei bawk.

Federico Chiesa hian nipui transfer-ah Juve aṭanga Liverpool zawmin, Premier League-ah minute 18 chiah a la khel a, Italian forward hian hliam vangin hun tam zawk khelmual pawn lamah a hmang.

Slot chuan, "Player pahnih hi thlan theih chu an ni tawh a, mahse, training session vawi khat kan la nei leh dawn. Federico hi a inkhel lo rei tawh a, thlithlai phawt a ngai ang. Diogo zawk hi chu squad-ah a awm thei tawh mai thei a, Chiesa pawh a thei mai thei," a ti a, player dang an dam ṭhat chuan an inlan rih loh a rinawm zawk.

Dutch coach chuan, "Chiesa hian inkhelh tam a mamawh a, thla nga emaw thla ruk emaw chawlh tawh chuan manager tana inkhelhtir chu thil harsa a ni ve. Nilaini zana League Cup-a Southampton kan hmachhawn hun pawh hi a bul ṭan leh nan chuan a fuh mai thei," a ti chauh.

Liverpool hi Premier League match 14 khelh tawhah vawi khat chauh la tlawmin hmahruaitu an ni mek a, pahnihna Chelsea aiin point liin an sang zawk a, match khatin an khel tlem bawk.