Messi-a'n Yamal a dah sang

Mi tam takin footballer piang tawh zinga ropui bera an chhal, Lionel Messi chuan a hmun ruak luah thei tura a rin an zawhna chu a chhang a, Barcelona rawlthar duhawm Lamine Yamal chuan hmabak êng tak a neih thu a sawi.

Messi chuan, "Footballer ṭhangduang, hmabak nei êng tak tak an awm. Lamine Yamal hi a kum naupan avang leh hmabak êng tak avangin mi tam takin footballer ropui tak la ni turah an ngai tih ka hria a, keipawhin mi pakhat ṭha bik ka thlang dawn a nih chuan ani hi ka thlan tur chu a ni ang.

"Ni e, amahah engkim a innghat tih pawh ka pawm a, football a nih miau avangin thil thleng thei tam tak a la awm bawk. Mahse, ani hi tun dinhmunah pawh player ṭha tak a nih bakah nakinah pawh a langsar bik a ni ang," a ti a, a ringtawk hle.

Yamal hian Spain tan Euro nomawi a chawi der tawh a, tun season-ah Hansi Flick-a hnuaiah vul lehzualin, inelna hrang hranga match 20 a khelh tawhah goal ruk khungin, assist vawi 12 a nei bawk.

Barcelona hi La Liga-ah hma a hruaipui mek a, league match 17 khelhah point 38 an nei tawh. An hnuai chiahah Real Madrid awmin, Carlo Ancelotti naute hian match khata khel tlemin, point hnih chiahin an phak lo - pathumna Atletico Madrid chuan match khat thoa khel tlemin, point thum chauhin an phak lo bawk.

La Liga top three chinte an la inhnaih viau a, boruak a 'hot' hle. Barca hian Pathianni zan dar 1:30-ah Leganes an mikhual ang a, Pathianni zan dar 6:30-ah vek Atletico Madrid chuan Getafe an mikhual dawn bawk - zanin dar 1:30-ah Real Madrid chuan Rayo Vallecano an lenchilh dawn thung.