Tlai dar 2:00-ah Aizawl FC Vs Rajasthan FC

Aizawl FC chuan vawiin tlai dar 2:00 hian Rajasthan FC an hmachhawn dawn. Mizo club hian an match hnuhnung berah Namdhari 3-1 in hneh lo mah se an khingpui tur Rajasthan hi Shillong Lajong laka 8-0 a chak lo hlim an ni.

Mizo hlanga khel Aizawl FC-in season bul an ṭan chhe lo a, vawiin chawhnua an inkhelhna tur RG Stadium-ah match hnih khel tawhin Dempo SC (0-0) leh SC Bengaluru (2-0) lak aṭangin point li an hlawh chhuak.

Victor Lalbiakmawia hote hi an muala match hnih an khelh hnuah an zin chhuak a, 1-1 in Gokulam Kerala chelh thei mah se goalkeeper Vanlalhriatpuia a inhliam. Kawnpui tlangval hi a ban ruh a tliah avangin tun season-ah a inlan dawn tawh lo.

Aizawl FC match hnuhnung berah Hriatpuia a khel thei lo a, Mizo club-in Namdhari lakah goal thum an chhuah. Hriatpuia thachhangdawltu Joel B. Lalramchhana tan vawiin hi insiamṭhat hun a ni a, Mizo mipui hmaah a theihna lantirna hun remchang a ni ang.

Mizo club hian match li an khelh tawhah squad an siksawi meuh lo a, striker pahnih C. Lalhriatpuia leh Lalrinzuala te an inkhelh chhawk tih loh chu inkhel bul ṭantute an thlak meuh lo. Rajasthan lakah match hnuhnung pathuma goal khung vek thei Hriata'n bul a ṭan a rinawm a, goal hmaa hriam zet Rinzuala pawh khelhna hun an siamsak ngei a rinawm.

Saitual tlangval Zothanpuia'n I League season ṭan hmain Aizawl FC a zawm a, Mizo club tan bul a la ṭan vek. Puipuia hian a club hlui Rajasthan a hmachhawn dawn a, ṭum dang zawng aiin a ṭan lehzual a rinawm.

Aizawl FC coach Victor Lalbiakmawia chuan, "Match hnuhnung berah kan chesual a, insiamṭhat kan ngai. Rajasthan lakah hnehna chan ngei kan tum," tiin Vanglaini a hrilh a, Mizo club-in result ṭha an neih theih nan Mizo mipui ṭawiawmna a pawimawh ang.