Last 16-ah Chelsea an lut

UEFA Conference League last 16 lut turin Chelsea tan harsatna a awm lo, an khingpui Astana chu 3-1 in an hneh. Blues hian match nga an khelh tawhah hnehna an chang vek a, anmahni chauh hi chak kim thei niin last 16 an lut fel der a ni.

Enzo Maresca naute hi inkhel turin Kazakhstan ramah an zin chhuak a, London khawpui aṭangin Astana hlat zawng hi mel 3,600 zet a ni a, khaw vawh lam chu -11C a ni hial bawk, inkhelh a awlsam lo ang tih a chiang.

Mahse, Chelsea hian goal khung an harsat chuang lo - Marc Guiu leh Renato Veiga ten goal an khung a, mualneitu player Aleksandr Marochkin chuan anmahni lamah a tilut bawk, goal thum an chhuah hnua Marin Tomasov-a goal khungin awmzia a nei phak tawh lo.

Kum 44 mi Enzo Maresca chuan, "Zinkawng thui tak kan zawh a, khua a vawt em em bawk. Chutiang kara ka naute khelh danah khan ka lawm takzet a ni, a nihna takah chuan khelmual kha kan tan chuan inkhelh a awlsam lo bawk.

"Academy player - Tyrique George, Sam Rak-Sakyi leh Josh Acheampong ten inkhelhna hun an nei thei a, an khel ṭha vek bawk. Kan team tan chuan tuna kan result hi duhthusam a ni," tiin a sawi.

Italian manager hian a sawi lawk ang ngeiin Premier League lama a chhawr rim loh player a chhawr nasa. Pathianni zan dar 12:30 hian Brentford nen EPL an khel zui leh nghal dawn, league-ah chuan a neih ṭhat ho an inlan leh thung ang.