Man City mikhual tur Man United

Pep Guardiola enkawl Manchester City chuan Pathianni zan dar 10:00 hian Ruben Amorim enkawl Manchester United an lo mikhual dawn, manager pahnih te Premier League bika an intawn vawi khatna tur a ni ang.

Man City hi an talbuai lai a ni, kar laihawl khan Champions League khelin an chak lo. Man United erawhin Europa League lamah Viktoria Plzen chu 2-1 in an hneh - United boruak ṭha mah se City aiin hahchawlhna hun ni khatin an nei tlem ve thung a ni.

Amorim hian Sporting Lisbon a enkawl laiin Man City hi a lo hmachhawn tawh a, an mikhual team chu 4-1 ngawtin an lo hneh - tunah erawh Man United manager a ni tawh, a hma lama an sulhnuin awmzia a nei dawn lo, boruak tharlam an hip tawh.

Hojlund awmna

Ruben Amorim-a'n Sporting Lisbon a enkawl lai khan player hman thiam fal em em mai a ni a, a hming chu Viktor Gyokeres a ni a, Swedish international striker milin a team a rem a, team hmuhnawm leh hlauhawm tak an ni.

Man United a zawn a, a club hmasa lama a naute a rem dan chu a la chhunzawm. Striker Rasmus Hojlund chuan hmun pawimawh a chang dawn tih a chiang - Denmark international hian Viktoria Plzen lakah goal hnih a khung - City hmachhawn turin a inpeih.

Rasmus Hojlund hi goal khung chakin a tuihal a, goal hnih a khung hnuah pawh a la duhtawk lo, goal khat dang siamsak thei tura ngaih Amad Diallo-a'n ball a pe lo a, inkhelh banah an inhauh pui phah, goal khung chak a tuihalzia lantirtu a ni.

Amorim chuan, "Ka lo hmu e, duhthusama ṭha a ni," tiin Hojlund leh Amad chungchang a sawi hmak, hnehna chan tum leh chak duh an nihna an lantir niah a ngai. Chak duhna thinlung nen Etihad Stadium pawh an lenglut ngei ang.

Harh ngai City

Pep Guardiola-a'n a enkawl chinah Man City hi an chet buai lai ber a nih hial a rinawm. Rodri inhliam a langsar a, Spanish midfielder hmunruak hnawh khat thei an awm lo, hei chu inhrilh nawn ngai loa thil chiang a ni.

Julian Alaverz thlaktu an nei ṭha lo hi an buaina a ni bawk - Erling Haaland hi engtik lai pawha goal khung thei reng a ni bik lo a, a ke hmui loh laia lo awinung ṭhintu Alvarez awm loh an tuar, season hmasa lama che ṭha Phil Foden a che ṭha rih lo bawk.

Buaina hrang hrang nei mah se Guardiola naute hi dah hniam theih erawh an ni tak tak lo; EPL table-ah palina an la ni a, an mikhual tur Man United hi 13-na an ni thung, an chet chhiat lai pawh hi sakeibaknei hliam anga hlauhawm an la ni tho.

Season hmasa khan Pep naute hian anmahni mual leh khualmualah Man United nen league an khelhin an chak ve ve, mahse FA Cup final-ah erawh United an chak thung, hneh sa ang maia mikhual dawnsawn a remchang dawn lo - tunah chuan Amorim-a enkawl an ni tawh bawk.