Kolkata khawpuiah Mizo hming a mawi

Ningani zana Indian Super League inkhel chu Mizo channa a ni - Odisha-in 2-1 in East Bengal an hneh a, player of the match chu Odisha forward Isak Vanlalruatfela a ni a, East Bengal goal awmchhun khungtu chu Lalchungnunga a ni a, Odisha tan Jerry Mawihmingthanga'n goal khat a thawh bawk.

Kolkata khawpuia inkhelah first half chhungin team pahnihin goal an khung lo a, minute 43-naah East Bengal midfielder Jeakson Singh chu hnawhchhuah niin, hei hi inkhel hmelhmang thlak danglamtu pakhat tih theih a ni.

Goal khung hmasa zawk erawh East Bengal an ni - minute 53-naah Lalchungnunga a inlar a, corner aṭanga ball kal chu Odisha keeper Amrinder Singh-a'n chingfel thei loin, heta ṭanga ball kal zel chu Durtlang tlangval hian goal-ah a chantir a, 1-0 in hma an hruai.

Mahse, East Bengal hlim chhung a rei lo hle. Minute hnih hnu lawkah Isak-a'n ṭha taka ball tlan luhpuiin, a sira mi Jerry Mawia tan a siamsak a, Chanmari tlangval hian chiang zetin tun season-a a goal hnihna turin a khung - minute 81-naah Hugo Boumous chuan khung ve lehin, 2-1 in Odisha an chak.

Isak-a chu tun season-a a vawi hnih nan hero of the match-ah thlan a ni a, Bawngkawn/Thingsulthliah tlangval hian first half-ah uiawm takin crossbar a pet per bawk - goal ngat se, goal ropui tur a ni. Isaka hian tun season-ah match 12 khelin goal khat a khung tawh a, assist vawi thum a nei bawk.

Ningani zan inkhelah Odisha tan Jerry leh Isak-a bakah Jerry Lalrinzuala leh K. Lalṭhathanga (Puitea) ten inkhel bul an ṭan a, East Bengal tan David Lalhlansanga chu bench aṭangin a lut bawk.