Kane a training ṭan leh tawh

November thla tawpa Borussia Dortmund nen an inkhelh ṭuma inhliam, Bayern Munich striker Harry Kane chuan training a nei ṭan ve leh ta a, mahse, amaha training a la neih rih avangin team-ah chuan a lo kir lawk rih lo ang.

Bayern hian Kane tel loin match thum an khel tawh a, DFB-Pokal aṭangin champion lai Bayer Leverkusen chuan an pet chhuak a, Heidenheim (4-2, Bundesliga) leh Shakhtar Donetsk (5-1, UCL) an hneh thung.

Kum 31 mi Kane hian a inhliam hmain tun season inelna hrang hrangah match 19 khelin goal 20 a khung a, German club tan an striker chhuanvawrin training a zawm leh ta hi thu lawmawm a ni.

Hetihlai hian hliam vanga rei tak chawl tawh Joao Palhinha leh Alphonso Davies ten training an nei bawk a, mimal vekin a la ni thung. Davies hi a tlan ṭan tawh a, Palhinha erawh ball tel loin training tir a la ni chauh.

Bayern hian zanin dar 8:00-ah league match khel turin Mainz an mikhual dawn a, anmahni hnaih bertu Eintracht Frankfurt aiin league match 13 khelh tawhah point rukin an sang zawk mek.