Mizo inchai palian champion lai Lalsangliana chuan amah chotu Lalrinchhana Sailo chu thawh sawm an inchai hnuah 66-0 in a hneh. Mizo ten infiamna kan ngaihhlut zingah pawh kan dah san ber 'Palian Title' hi vawi li a la tling ta chiah a ni.
Nilaini zan khan LPS Arena, Falkland Vengah Mahindra XUV3XO Mizo Inchai Title Fight 2024 chu a hmawr bawk niin, mipui ngaihven leh inchai hnuhnung ber ni bawkah Sangliana hi a chungnung hle, a tir aṭanga a tawp thlengin harsatna a tawk lo.
Excise & Narcotics Department-a hna thawk lai Sangliana hian a champion kawnghren a humhim a, champion lai a nih bawk avangin Rs Rs 1,00,000 a hlawh, amah chotu Lalrinchhana'n Rs 50,000 a hlawh thung.
Title humhim
Inchai ṭan hmain zawhna an zawt a, i champion title kawl lai hi a humhim thei ang em? tiin Sangliana an zawt a, Upper Repubic veng chhuanvawr chuan, "Kan vengah ka hawn leh dawn," tiin a chhang, a inringtawk hle tih a chiang.
Lalrinchhana pawhin Sangliana champion kawnghren chhuhsak a tum thu leh, chhuhsak tura inchai a nih thu a sawi. Mahse, North Vanlaiphai tlangval Chhana tan Sangliana meuh chu a la khauh lutuk a, paltlang zawh rual a la ni lo.
A tir lamah an inveng tawn viau a, mahse inveng reng theih a ni lo. Tawnhriat nei ṭha leh tharum ngah Sangliana'n a zangthal leh bawkkhup zawngin a bawhbet a, a khat tawkin a nawr chhuak deuh reng bawk.
Sangliana hi kg 24 zetin a rit zawk a, thiam leh tawnhrat nei ṭha a nih tel avangin a tir aṭanga a tawp thlengin inchai a thunun tluan thei a, harsatna lian tham tawk loin a khingpui a hneh, a phu ang ngeiin palian title a humhim leh ta a ni.
Sangliana a lawm
Kum 2014 aṭangin Sangliana hian palian title a kawl ṭan a, tun thlengin tuman an la chhuhsak lo - kum 10 chhung chu a ta neih hmiah tawh tihna a ni. Amah chotu PB Lalnienga, Lalnunfela (vawi hnih) leh Lalrinchhana Sailo lakah a kawnghren a humhim vek.
Sangliana chuan, "Ka khingpui Chhana khan tharum a ngah khawp mai a, mahse a theihna ang tak a hmang chhuak tawk lo deuh, amah a inven nasat avangin hmachhawn pawh a awlsam lo viau a, a tawpah chuan a vannei zawk ka ni.
"Ka taksa dinhmun a ṭha a, nuamti taka ka inchai theih avangin ka lungawi. Office lama ka thawhpui leh kan veng mipui ten minṭawiawm ṭha em em a, hmun hrang hrang aṭangin duhsakna ka dawng bawk, an zavai chungah lawmthu ka sawi," tiin Vanglaini a hrilh.
Sangliana hian inchai chawlhsan mai a la tum lo a, a ban na ṭhin pawh a dam chian tawh avangin a theih anga rei chu inchai a tum tih a sawi. Sangliana 'meuh' hneh theitu hi Mizo fa hrin zingah an lo chhuak ang em tih chu ngaihtuah tham a ni.
Inchai Chanchin
Thawh khatna: A tirah an fimkhur dun hle a, innawr tawn ringawt tlu miah lo in an tluan a, a inven nasat avangin Chhana point paihsak a ni. (1-0)
Thawh hnihna: Sangliana'n a nawr chhuak nghal, a hnuah zangthalin vawi li chhiar thleng a bawhbet a, Chhana tal chhuak mah se vawi 10 chhiang thleng Sangliana a bawhbet zui. (15-0)
Thawh thumna: Sangliana'n tharumin Chhana bawkkhup lai kuai zangthalin vawi nga chhiar thleng a bawh hnuah tal chhuak mah se, vawi 10 chhiar thleng chiang takin a bawhbet zui. (15-0)
Thawh lina: Chhana'n bawhbeh tumin bei viau mah se a chesual zawkah a ṭang. Sangliana'n bawh fuh lehin vawi khat chhiar a nih hnuah lehlam a tal chhuak na a, a hnuah bawhkhup zawngin vawi 10 chhiar thleng a bawhbet. (11-0)
Thawh ngana: Chhana a inveng nasa - mahse Sangliana'n a duh hun hunah a nawr chhuak thei emaw tih mai turin tum hnih a nawr chhuak a, Chhana'n lehlam nghawnga a man thin avangin point paihsak a ni. (3-0)
Thawh rukna: Sangliana'n vawi thum a nawr chhuak leh a, chutbuai lai nei lem loin thawh thumna a la tluan. (3-0)
Thawh sarihna: Sangliana'n vawi nga nawr chhuakin Chhana'n kawng engkima a el pha lo tih a lang. (5-0)
Thawh riatna: Sangliana'n vawi hnih a nawr chhuak hnuah a inven nasat avangin Chhana point paihsak a ni. Sangliana'n man fuhin a kuai zangthal a, vawi thum chhiar thleng a bawhbet hnuah tal chhuak mah se tum thum a nawr chhuak zui. (8-0)
Thawh kuana: Sangliana'n hahdam takin a khel a, lehlam invenna karah che sual tur khawpin a bei lo a, ṭum hnih a nawr chhuak. (2-0)
Thawh sawmna: Sangliana'n vawi hnih a nawr chhuak a, a khelh dan avangin Chhana point paihsak a ni tel bawk. (3-0)
